Elimizde «Táýelsizdik urpaqtary» atty joba júzege asyryla bastaǵany belgili. Osyǵan oraı árbir jergilikti qala, aýdan ákimdikteri jas kásipkerlerge arnalǵan granttar belgiledi. Sátbaev qalasynyń ákimdigi de bes baǵyt, ıaǵnı ǵylym, mádenıet, aqparattyq tehnologııalar, bıznes, medıa salasyna qatysty jobalarǵa konkýrs jarııalaǵan bolatyn. Burynǵylarǵa qaraǵanda bıylǵy konkýrstyń bir ereksheligi, jasy 14-ke tolǵan jasóspirimderge de qatysýǵa ruqsat berildi.
Jarııalanǵan konkýrsqa barlyǵy 48 ótinish tústi. Olar óz jobalaryn arnaıy komıssııanyń talqysyna salyp, qorǵap shyqty. Komıssııa 10 jobany jeńimpaz dep tanydy.
Jeńimpazdarǵa grant tapsyrý saltanatty jaǵdaıda ótti. Sátbaev qalasynyń ákimi Murat Bóribaev búgingi jas kásipkerlerdiń keleshekte bıznestiń iri ókilderine aınalýyna tilektestik bildirdi.
«Sizderdiń búgingi talaptaryńyz – erteńgi zor isterińizdiń alǵashqy baspaldaǵy ǵana. Memlekettiń qamqorlyǵy arqasynda kásipterińiz órkendep, qanatyn jaıa bersin», dedi ol.
Qalanyń belgili kásipkerleri A.Turlubek, Á.О́teǵalıuly 90-jyldardaǵy qıynshylyqtar týraly sóz qozǵady.
«Bizge memleket ol kezde grant bergen joq, óıtkeni ondaı múmkindik te joq edi. Bankterdiń nesıe ústemesi tipti aqylǵa qonymsyz boldy. Sondaı qıyndyqtar qazir keıin qaldy. Memleket elimizde kásipkerliktiń damýyna jan-jaqty qamqorlyq tanytyp keledi. Osy qamqorlyqty sezine bilgenderińiz abzal. Halyqqa qosymsha jumys oryndaryn usyný, tıisti salyq tóleý arqyly qalanyń qazynasyn tolyqtyrý kerek», degen aǵa býyn ókilderi jas kásipkerlerge sáttilik tiledi.
Jeńimpaz atanǵan jastardyń arasynda eń jasy kishisi Eskendir Ardaquly eken. Ol Bilim ınnovasııalyq mektebiniń 11-synybynda oqıdy. Tabıǵatynan ıkemi bar bala aǵashtan qazaqtyń ulttyq mýzykalyq aspaptaryn, kıiz úı , t.t. kádesyı retinde jasaıdy.
«Balamyzdyń ıkemin baıqaǵan soń, alǵashynda «telefon shuqylap otyrǵansha, osy óneriń durys» dep kompıýter, basqa da qural-jabdyqtaryn alyp bergenbiz. Qazir ol jumysyn jetildire tústi, sondyqtan, jańa qural-jabdyqtar alý qajettigi týyndady. Sondyqtan lazerlik sheberhana ashý týraly joba jasap, konkýrsqa qatysyp, jeńipaz atanyp otyr. Biz buǵan óte qýanyshtymyz, alǵystan basqa aıtarymyz joq», deıdi Eskendirdiń ata-anasy Ardaq pen Baqytkúl. Eskendir jasaıtyn dúnıesiniń dızaınyn da ózi oılastyrady.
Qurylysqa qajetti sym óndirýmen aınalysýdy qolǵa alǵan jas kásipker Bota Hafızovtiń jobasy da ózindik ereksheligimen tartymdy. Ol shaǵyn seh ashyp, óndiristi jolǵa qoıyp alǵan soń, suranystyń mol bolatynyna senimdi.
«Bizdiń óńirimizde, ásirese Jezqazǵan, Sátbaev qalalarynda keıingi jyldary qurylys qarqyn ala bastady. Sony kórip, bilip júrgen soń, osyndaı ıdeıa týyndady», degen Hafız oıdaǵyny júzege asyrýǵa múmkindiktiń molaıa túskenine qýanyshty.
Al jeńimpazdar qatarynan kóringenderdiń biri Rınat Muhametshın dánekerleý sehyn ashýdy kózdese, Gúldana Shákenova DTF arkyly jáne shelkografııa ádisimen eksklıýzıvti kıim óńdeýdi qolǵa alýdy maqsat etken. Árbir jobanyń óz ereksheligi bar. Jeńimpazdarǵa 2 mln 500 myń teńgeden 3 mln 500 myń teńgege deıin grant berildi.
«Jas kelse – iske» degendeı, jastardyń óz kásipterin qolǵa alǵandary árıne, óte súıinishti. Olardyń qatary jyl sanap artyp keledi. Degenmen áli de azdyq etip jatqany da belgili. Bul týraly el Prezıdenti Qasym-Jomart Toqaev bıylǵy halyqqa Joldaýynda «2029 jylǵa qaraı orta bıznestiń el ekonomıkasyndaǵy úlesi 15 paıyzǵa jetýi kerek. Bul – Úkimettiń aldynda turǵan mańyzdy mindet. Qazir bul kórsetkish – 7 paıyz shamasynda. Ár kásipker qoldaýdyń qandaı túri bar ekenin jáne oǵan qalaı qol jetkize alatynyn esh qıyndyqsyz bilip otyrýy qajet. Sonda shaǵyn bıznes orta bıznes sanatyna ótýge múddeli bolady» degen bolatyn.
Prezıdenttiń atap kórsetkenindeı, «shaǵyn bıznestiń orta bızneske ótýge múddeli» bolýyn qamtamasyz etýdiń bir joly – jas kásipkerlerge jergilikti ákimderdiń grantyn berý. Osy joba aıasynda qanshama jas kásipker ómirge joldama aldy. Kelesi jyldan bastap «Táýelsizdik urpaqtary» granty jergilikti deńgeılerde de bes emes, alty baǵyttan turatyn bolady. О́ıtkeni buǵan volonterlik baǵyt ta qosylady. Demek jańa jobalar jalǵasyn tabady. Kásipkerliktiń damýy ekonomıkany ártaraptandyrýǵa alyp keledi. Jas kásipkerlerge degen qamqorlyqtyń túpki maqsaty da – osy.
Ulytaý oblysy,
Sátbaev qalasy
