Túrkistan oblysyna jınalǵan qurama músheleri jalpy jattyǵýǵa kiristi. Bokstan ulttyq quramanyń keńeıtilgen quramdaǵy jattyǵýyna ár salmaqta barlyq óńirden boksshylar shaqyryldy.
Quramanyń bas bapkeri qyzmetine taǵaıyndalǵan Qaırat Sátjanovtyń bapkerlik biligi synalatyn sát te jaqyn. Qyrkúıektiń sońyn ala Shymkent qalasynda halyqaralyq týrnır jalaýyn jelbiretedi. 29 qyrkúıekte bastalyp, 5 qazanda máresine jetetin Keńes Odaǵynyń batyry Qaraqozy Ábdalıevti eske alýǵa arnalǵan halyqaralyq týrnırde ár salmaqtaǵy boksshylardyń áleýeti saralanyp, qarymy baıqalmaq. Bas bapker ulttyq quramanyń kapıtandyq tizginin Jasóspirimder olımpıadasynyń jeńimpazy, Azııa chempıony Aıbek Oralbaıǵa júkteýdi jón kóripti.
Q.Sátjanov Parıj jazǵy Olımpıadasynan keıin ulttyq quramadaǵy boksshylardyń keıbiri salmaq dárejesin aýystyrǵanyn atap ótti. «Azııa chempıonaty bedeldi doda sanalatyndyqtan, quramanyń úzdikterin aparamyz. Keıbir boksshylar salmaq dárejesin ózgertti. Árqaısysy kóshbasshylyqty tizgindegisi keledi. Básekelestiktiń áleýeti artqanda ǵana nátıje kórinedi.
48 kg salmaq dárejesinde álem chempıondary Temirtas Júsipov pen Sanjar Táshkenbaı bar. Olarǵa aıtarlyqtaı básekelestik týdyratyn jastardyń shoǵyry da ósip keledi. 51 kg salmaqta Tokıo Olımpıadasynyń qola júldegeri, álem chempıony Sáken Bıbosynov bara ma, joq álde Damır Ábdihalyqovqa senim artamyz ba, ony aldaǵy kúnderi naqtylaımyz. Mahmud Sabyrhan 54 kg salmaq dárejesine tómendeıtinin aıtty. Serik Temirjanov 60 kg salmaqqa ótti. Ulttyq quramanyń kapıtany atanǵan Aıbek Oralbaı asa aýyr salmaqqa aýysyp jatyr. Qurlyq chempıonatyna deıin Qamshybek Qońqabaev ekeýiniń deńgeıin saralaımyz», dedi bas bapker.
Mahmud Sabyrhan Parıj jazǵy Olımpıadasyna 57 kg salmaq dárejesinde qatysyp, alǵashqy aınalymda-aq dodadan shyǵyp qalǵan bolatyn. 1/8 fınalda ıspan Hose Kılespen judyryqtasyp, 4:1 esebimen jol berdi. Sabyrhannyń soıyna 57 kg salmaq dárejesine ótý áli erte ekeni, boıynyń tapaldyǵy, qulashynyń qysqalyǵy Parıjdegi tórtjyldyq dodasy bastalǵanǵa deıin de, uly alamannan keıin de az talqylanǵan joq. Byltyr О́zbekstanda ótken álem chempıonatynda Mahmud 54 kg salmaqta synǵa túsip, álem chempıony atandy, tipti fınaldyq jekpe-jekte ózbek boksshysy Oıbek Jýraevty eki márte eseńgiretip, nokdaýnǵa da túsirgen edi. О́ziniń salmaǵyna qaıta oralǵan sańlaq Azııa chempıonatynda olja salýdy kózdeıdi.
Shymkentte ótetin halyqaralyq týrnırde bapkerdiń nazaryna ilikken boksshylar 30 qarasha men 12 jeltoqsan aralyǵynda Iordanııanyń Amman qalasynda ótetin Azııa chempıonatynda baq synaıdy.
Fýtzal: Álem chempıondaryna ese jibermedi
О́zbekstanda fýtzaldan álem chempıonaty ótip jatyr. Ulttyq qurama «D» tobynda synǵa túsedi. Alǵashqy matchty azýly Ispanııa ulttyq quramasyna qarsy ótkizgen otandastarymyz 1:1 esebimen teń tústi.
Oıynnyń 5-sekýndynda enshisine gol jazyp, esep ashqan Birjan Orazov ulttyq quramadaǵy 60-oıynyn ótkizdi. «Teń esepti qomsynbaımyz, biraq biz jeńiske jetemiz dep alańǵa shyqtyq. Álem chempıonatyna kelgenge deıin birneshe eldiń quramasymen joldastyq match ótkizip, áleýetimizdi tarazyladyq. О́zbekstannan jeńispen oralatynymyzǵa senimdimin, el úmitin aqtaý jolynda aıanyp qalmaımyz», dedi B.Orazov.
Bas bapker Paýlo Rıkardo Kaka dúbirli tartys quddy bir óz elimizde ótip jatqandaı áserge bólengenin atap ótti. «Ándijanǵa jankúıerlerimiz kóptep jınalǵany mereıimizdi asyrdy. Olardyń qyzý qoldaýyn sezindik. Álem chempıonaty óz elimizde ótip jatqandaı áserlendik. Goldy aldymen bizdiń oıynshymyz soǵyp, alǵa shyqtyq. Basymdyqty match sońyna deıin ustap turýǵa tyrystyq. Biraq tartystyń bel ortasynda Dáýren Tursaǵulovtyń qyzyl qaǵaz alyp, alańnan qýylýy jigitterge psıhologııalyq qysym boldy. Soǵan qaramastan tegeýrindi qarsylastyń arynyn tejeı aldyq. Álem chempıonatynyń tartysy áli alda», dedi Kaka.
Qazaqstan ulttyq quramasy fýtzaldan álem chempıonatyna buǵan deıin úsh márte qatysty, 2021 jyly 4-orynǵa turaqtady. Al Ispanııa quramasynyń enshisinde eki dúrkin álem chempıony degen ataǵy bar.
Búgin aqsham aýa Ándijan sport kesheninde bizdiń jigitter Lıvııa quramasynyń qarymyn baıqap kóredi. Bul matchqa aıyp qaǵazyn alǵan Dáýren Tursaǵulov qatyspaıdy. FIFA-nyń Tártip komıteti budan keıingi oıyndarǵa qosylýyna ruqsat etpek. Lıvııa quramasy álem chempıonatynyń betashar matchyn Jańa Zelandııa quramasyna qarsy ótkizip, 3:1 esebimen jeńiske jetti.
