Bilikti pedagog – turaqty órkendeýdiń negizi

Máseleniń bulaı qarastyrylýy kóbine álemdik damý dınamıkasyna, ulttyq jáne aımaqtyq, sondaı-aq jahandyq aýqymdaǵy ekonomıkalyq damý jaǵdaılarynyń tez ózgerýine baılanysty. Atap aıtqanda, kóptegen halyqaralyq sarapshy buǵan deıin ozyq ulttyq bilim júıeleriniń aldynda jas urpaqty sıfrlyq daǵdy­lar­ǵa úıretý mindeti turǵanyn atap ótken edi. Al qazir oqýshylarǵa jasandy ıntellektimen jumys isteý daǵ­dylaryn úıretý qajettiligi týyndap otyr. Bul bilim júıeleriniń, sonyń ishinde bizdiń elimizdiń aldynda jańa syn-tegeýrin ekeni sózsiz. Jasandy ıntellekt – «taıaqtyń eki ushy» bar úderis. Úlken oń múmkindiktermen qa­tar, alaıaqtyq, qaýipsizdik deńgeıiniń tómendeýi jáne basqa da kóptegen táýekel bar. Bul synaqqa jaýap, eń aldymen, otandyq pedagogterdiń áleýetin úzdiksiz arttyrý júıesin tereńinen zerdeleýdi talap etedi. Pedagogter ortasynda jas­tardy oqytý men tárbıeleýdiń jańa daǵdylaryn ıgerýdiń turaqty qajet­tiligin qalyptastyrý mańyzdy.

Zamanaýı álemde qosymsha bilim qyzmetiniń naryǵy ósip keledi. Kóp­te­gen el jyl saıyn pedagogterdiń bilik­tiligin arttyrýǵa, eń aldymen olar­­­dyń qosymsha bilim alýyna mıl­lıard­taǵan qarajat bóledi. Elimizde de muǵalimderdi turaqty qaı­ta daıarlaý júıesin jetildirý ma­ńyzdy. Peda­gog­ter­diń kásibı damýyna mem­lekettik jáne jeke maqsatty ınves­tısııalar qajet.

Búginde «О́rleý» pedagogterdiń bilik­ti­ligin arttyrý ulttyq ortalyǵy sapaly bilim kontentin qurý, pedago­­gı­ka­lyq qyzmetke yntalandyrýdy arttyrý jáne qundylyǵyn nyǵaıtý boıynsha jumys júrgizip jatyr. Pedagogıkalyq ujymdarǵa otandyq jáne sheteldik ózekti jáne ınnovasııalyq tájirıbeni úzdiksiz taratýdy qamtamasyz etip otyr. Sonymen qatar pedagogtiń jańa pedagogıkalyq daǵdylarǵa qajettiligi eskeriletin qaıta daıarlaýdyń qolaı­ly formattaryn izdeý jáne en­giz­ý jumystary júrgizilip jatyr. Qazirgi ýaqytta «О́rleý» BAUO peda­gog­terdiń biliktiligin arttyrýdyń ke­shendi baǵ­dar­lamasyn kezeń-kezeńimen júze­ge asyrýǵa kiristi. Ol oqytýdyń úsh deń­ge­ıin, qatysýshylardyń kýrs­tan keıingi qoldaýyn qamtamasyz etedi. Ádisker pedagogterge arnalǵan kýrstar da ótki­zilip keledi. «О́rleý» BAUO-da aralas (gıbrıdti) oqytýdyń tıimdi tehnologııalary qoldanylady. Oqý úderisin durys jobalaýdyń jańa tásilderi jan-jaqty qarastyrylyp jatyr. Alǵash ret Maqsatty mektep muǵalimderine arnalǵan onlaın rejimindegi bazalyq kýrstar bastaldy. Bul BBJM, PIZA, PBB, UBT nátıjeleri boıynsha 1,5 mıllıonnan asa derekti taldaý ne­gi­­­zinde ázirlengen. Munda sondaı-aq jan-jaqty dıagnostıkalyq jáne qalyp­tastyrýshy baǵalaý tehnologııa­lary jınaqtaldy. 40 myńnan asa peda­gogtiń pándik quzyrettilikteri men áleý­mettik-emosıonaldyq beıini týra­ly alynǵan úlken derekter aldaǵy ýa­qyt­ta pedagogterdi oqytýdyń tıimdi mo­del­de­rin, algorıtmderi men nysandaryn ázirleý úshin óńdeledi.

Sonymen qatar qazir Prezıdent usynǵan «Jaıly mektep» ulttyq jobasy aıasyndaǵy bilim uıym­da­rynyń pedagogterine arnalǵan kýrs­tar­dyń arnaıy júıesi ázirlenip jatyr. Prezı­dent­tiń Qazaq­stan halqyna Jol­daýynda ony odan ári júzege asy­rý, jaıly mektepter úshin jeke basqarý júıesin qurý da mańyzdy memlekettik praktıkalyq min­det re­tin­de belgilendi.

Memleket basshysy 2025 jyldy Jumysshy mamandyqtary jyly dep jarııalady. Onyń iske asyrylýynyń mańyzdy quramdas bóligi ulttyq tehnı­ka­lyq jáne kásiptik bilimdi reformalaý jónindegi sharalary bolatyny sózsiz. Sondaı-aq qazirgi zamandaǵy eńbek naryǵy úshin jumysshy maman­da­ryn daıarlaýdyń joǵary sapasyn qamtamasyz etetin pedagogterdiń bilik­tiligin arttyrýdyń jańa júıeli tásil­de­rin aıqyndaý jáne ony júzege asyrý mańyzdy. «О́rleý» BAUO TjKB pedagogteriniń biliktiligin arttyrýdyń birqatar baǵdarlamasyn iske asyrýdy, olardy oqý úderisinde sımýlıatorlardy, vırtýaldy jáne naqty ortany, kross-pándik jáne jobalyq oqytý quzyretterin qoldanýdyń ın­novasııalyq ádistemelerine oqytý­dy josparlap jatyr.

Pedagogıkalyq sheberlikti únemi arttyrý júıesinde «Ustaz» ulttyq onlaın-platformasy erekshe ról atqa­rý­ǵa tıis. Bul eldegi pedagogıkalyq tá­jirı­beniń, pedagogterimizdiń ká­sibı je­tis­tikteriniń elektrondyq qaı­nar kózine aınalady jáne elimizdiń árbir óńirindegi kez kelgen pedagogke qoljetimdi bolady. Plat­formany qurý jáne mazmunyn tol­tyrý boıynsha jumys belsendi júr­giziledi.

Ustazdyń úzdiksiz kásibı damýy eko­no­mıkanyń, memleket pen ulttyń tabys­ty damýynyń strategııalyq aspektisi ekenin atap ótý mańyzdy. Prezıdenttiń Qazaqstan halqyna Joldaýynda osyn­daı mindet qoıý pedagogterdiń már­tebesin arttyrady, olardyń jańa býyn daıarlaýdaǵy erekshe rólin bil­diredi. Bul memlekettik saıasattyń aýqymdy baǵyty, tıisti sharalardy jan-jaqty, sapaly qarastyryp jú­zege asyrǵan jaǵdaıda ulttyq bilim júıesi úshin ǵana emes, búkil eldiń damýy úshin de jańa múmkindikterge jol ashady.

Aıdana ShILIBEKOVA,

«О́rleý» pedagogterdiń biliktiligin arttyrý ulttyq ortalyǵy» AQ basqarma tóraǵasy