Naqty úderis baıaǵyda bastalǵan. 2022 jyly 3 kompanııanyń ınjenerlerine Aı betinde turýǵa laıyqty, qýaty 40 kılovattyq ıadrolyq qondyrǵy jasaý týraly pármen berilgen edi. Erejege sáıkes, ol 10 jylǵa deıin istep turýǵa tıis. Joba quny – 5 mln dollar. «Aıdaǵy ıadrolyq qýat kózin kórsetý osy energııanyń qaýipsiz ekenin dáleldeý, Aıda uzaq merzimdi barlaý úshin qajet», degen edi «Nasa» tehnologııalyq demonstrasııalyq mıssııalar baǵdarlamasynyń dırektory Trýdı Kortes.
Kıeli keshirim
Ǵalamnyń ǵajaby degen atqa ábden laıyq bir oqıǵa bar. Ol kegin keshirimge aıyrbastaǵan ana týraly.
Bul oqıǵa Iranda bolǵan. 2007 jyldyń kúzinde Samereh esimdi áıeldiń 18 jastaǵy uly kisi qolynan qaıtys bolady. Qylmysker kisi óltirgeni úshin ólim jazasyna kesildi. Qyrshyn ketken bozbalanyń ata-anasy qylmyskerdi darǵa asatyn kúndi asyǵa kútedi. Saǵat jyljyp, moıynǵa arqan túsetin kún týady. Qusadan qan jutqan áıel darǵa asylaıyn dep turǵan jigitti keshiredi. Sońǵy demi shyǵar ýaqytta bárin toqtatady. Toqtatady da: «Eger bul ómirde keshirýge bolmaıtyn bir qatelik bolsa, ol – keshire almaý» deıdi. Sol kúni kúlli Iran halqy jylaǵan edi...
Bir kúndi ótkizip jibereıik...
Muqaǵalıdiń «Ýaqytty toqtatar shamań bar ma?» degen óleńi oıǵa oraldy. Artynsha ýaqyt beldeýin jaqynda ǵana aýystyrǵanymyz eske tústi. Al qazir Samoa shtatynyń kúntizbeden bir kúndi alyp tastaǵanyna tańǵalyp otyrmyn.
Samoa shtatynda 2011 jyldyń 30 jeltoqsany bolǵan joq. Mundaı sheshimdi bılik ýaqyt beldeýin UTC–11-den UTC+13-ke aýystyrý úshin qabyldady. Onyń sebebi tipten qyzyq. Áýelde saýda qatynastary AQSh pen Ulybrıtanııaǵa baǵyttalǵan-tuǵyn. Keıinirek iskerlik baǵyt Aýstralııa men Jańa Zelandııaǵa ótti. Solaı bir kúndi alyp tastap, eki el arasyndaǵy ýaqyt aıyrmashylyǵyn joıdy.
