«Pyri» dep atalatyn bul qurylǵy jasandy ıntellektige negizdelgen. Ol orman órtenip, qyzǵan kezde tıisti orynǵa dereý habar beredi. Túri qaraǵaı jańǵaǵyna uqsas. «Qýatty jylýdan, kúnnen alatyndyqtan, paıdalaný merzimi sheksiz. Qurylǵyny orman alqabyna áýeden ushaq arqyly tastaýǵa nemese alys mańnan laqtyrýǵa bolady. Synbaıdy, qýaty taýsylmaıdy. Ár eldegi ulttyq saıabaqtarmen seriktestik ornatýǵa ázirmiz. Ǵalamdy jahandyq jylyný jaılaǵan tusta orman órti tym jıilep ketti. Al myna qurylǵynyń tilsiz jaýdyń aldyn alyp, ony erte anyqtaýda tıimdiligi orasan», deıdi joba avtory Bleık Gýdvın.
Aǵash egetin drondar
Brazılııa ormandy alqapty qalpyna keltirý maqsatynda dron qoldana bastady. Naqtyraq aıtsaq, ushý apparattary otalǵan aǵashtardyń ornyna áýeden tuqym sebedi.
Mamandardyń aıtýynsha, bul iste qurylǵylardyń paıdasy zor. Ásirese adam qoly jete bermeıtin jerlerde kómegi kóp. Drondar nebári bir kúnde 50 gektar aýmaqqa tuqym seýip shyǵady. Iаǵnı adamnyń eńbek kúshinen áldeqaıda jyldam ári ónimdi. Brazılııa osy tehnologııanyń arqasynda bir mıllıon túp aǵash egýdi kózdep otyr.
Qaıta oralǵan Turan jolbarysy
Elimizge Nıderlandtan Amýr jolbarystary jetkizildi. Olar Ile-Balqash rezervatyndaǵy qorshaý ishinde ustalady. Keıin olardyń arlandary ashyq tabıǵatqa jiberiledi.
Turan jolbarysyn Ortalyq Azııada ustaýǵa qolaıly oryn retinde Balqash kóliniń ońtústik jaǵalaýy, Esil ózeniniń atyraby tańdalǵan. «Elimizge eki jolbarys Nıderlandtan ákelindi. Bul – erekshe oqıǵa. Ile ózeni men Syr ózeniniń jaǵasynda osy Turan jolbarysy ótken ǵasyrdyń 40-jyldarynda bolǵan. 2025 jyly Reseı Federasııasynan taǵy da 3-4 jolbarys jetkiziledi», dedi Ekologııa jáne tabıǵı resýrstar mınıstri Erlan Nysanbaev.
