Foto: QR TSM
Erbol Myrzabosynov shahmatshylardy aıtýly jeńisimen quttyqtap, olardyń jetistigin joǵary baǵalady. Sondaı-aq mınıstr bul jeńis Qazaqstandaǵy shahmattyń qarqyndy damýynyń aıqyn kórinisi ekenin, Memleket basshysy elimizde shahmatty damytýǵa erekshe kóńil bólip otyrǵanyn jetkizdi.
«Shahmat olımpıadasynda ekinshi oryn ıelengen qyzdar quramasyn tarıhı jeńisimen shyn júrekten quttyqtaımyn! Bul jeńis Qazaqstandaǵy shahmattyń qarqyndy damýynyń aıqyn kórinisi dep bilemin. Búgingi tańda elimizde 7 myńnan astam shahmat seksııasy jumys isteıdi, al bul sportpen aınalysatyndardyń sany 200 myńnan asady. Qyzdar quramasy shahmat olımpıadasyna basty favorıtterdiń biri retinde qatysty. Soǵan laıyq óner kórsetti. Olar Qazaqstan shahmatynyń deńgeıi joǵary, bolashaǵy jarqyn ekenin bar álemge pash etti. Osy oraıda shahmatshylardy daıyndaǵan jattyqtyrýshylarǵa, qoldaý kórsetken barsha jankúıerge, sportshylardyń ata-analaryna alǵysymdy aıtamyn», dedi mınıstr.
Aıta keteıik, Qazaqstan áıelder quramasy sońǵy týrda AQSh-pen teń túsip (2-2), 18 upaı jınady. Ulttyq qurama sapynda el namysyn Bıbisara Asaýbaeva, Merýert Kamalıdenova, Ámına Qaıyrbekova, Ksenııa Balabaeva, Alýa Nurman qorǵady.
Búkilálemdik shahmat Olımpıadasy eki jylda bir ret uıymdastyrylady. Osyǵan deıingi dodany Úndistannyń Chennaı qalasy qabyldap, Qazaqstan arýlary (Bıbisara Asaýbaeva, Jansaıa Ábdimálik, Gúlishan Nahbaeva, Ksenııa Balabaeva, Nazerke Nurǵalı) 352 upaımen úzdik bestikti túıindegen edi.
