Bul joly oblystyq ákimdiktiń qoldaýymen ótken aımaqtyq «Jigit sultany» baıqaýy Aqmola oblysynyń – 85, Birjan saldyń – 190, Balýan Sholaqtyń – 160, Raqymjan Qoshqarbaev pen Kóken Shákeevtiń 100 jyldyǵyna arnaldy. Taǵylymy mol sharany tamashalaýǵa kelgen kózi ashyq, kókiregi oıaý jurtshylyq Alashtyń asyp týǵan azamattarynyń ómir jolynan ónege alyp, tirshiliktegi tálimdi isterin taǵylym qyldy desek, artyqtyǵy joq. Osy turǵydan alǵanda Pavlodar, Soltústik Qazaqstan oblystarynyń birqatar aýdanynan kelgen órimdeı jastardyń qatysýymen ótken baıqaý óte tartysty boldy.
Eki kezeńnen turatyn «Jigit sultany» aımaqtyq baıqaýyna qatysýshylar Uly dala serileriniń boıyndaǵy qasıetterin pash etti. Kileń qaqpaq jaýyryndy, óneri órlep turǵan, saıdyń tasyndaı jastar kórermenderdi tánti etti. Baıqaý sharty boıynsha birinshi kezeńde jigitter ózderin kórkem sózben kestelep, óleńmen órip, tanystyryp shyqty. Arqanyń dástúrli án mektebiniń shoq juldyzdary Birjan sal, Balýan Sholaqtyń ásem ánderin oryndap, halyqtyń án qazynasyn jaquttaı jarqyratyp, kórsete bildi. Ekinshi kezeńde jamby atý, aýdaryspaq, gir kóterý, qazaq kúresi tárizdi ulttyq sporttyq saıystarda da sheberliktiń shyńyna shyqqan órender ekenin áıgiledi.
Qazylar alqasynyń sheshimi boıynsha aımaqtyq «Jigit sultany» baıqaýynyń bas júldesine astanalyq Álı Rızabek laıyqty dep tanyldy. О́zge atalymdar boıynsha zerendilik Hamza Aıdyn, Egindikól aýdanynan kelgen Táttimbek Aıbek, Sanah Erkebulan, Krasnoıar selosynyń ókili Ysqaq Aıbek marapattaldy.
KО́KShETAÝ
