Bizdi qyzyqtyrǵany – atalǵan gazettiń 1961 jylǵy 28 maýsymdaǵy sany. 35-betine sol ýaqytta qaıtys bolǵan mańyzdy tulǵalar týraly qazanamalar berilipti. Sonyń biri – bizdiń zańǵar jazýshymyz Muhtar Áýezov haqynda. AQSh gazetiniń qazaq jazýshysyna arnaǵan qazanamasynyń tolyq mátini mynadaı:
«1959 jyly eki tomdyq shyǵarmasymen Lenın atyndaǵy syılyqty ıelengen keńes jazýshysy Muhtar Áýezov qaıtys boldy. Ol qazaqtyń aqyny, fılosofy. Onyń «Abaı» jáne «Abaı joly» atty eki tomnan turatyn shyǵarmasy eki jyl buryn Lenın atyndaǵy syılyqty jeńip alǵan. TASS agenttiginiń habarlaýynsha, ol keshe Almatyda qaza tapty. Jasy 63-te» deı kele, Muhtar Áýezovtiń Shyńǵystaýda týyp-ósip, keıin kele Abaıdyń ómiri jóninde kesek shyǵarma jazǵanyn, Lenıngrad ýnıversıtetinde bilim alǵanyn, kóptegen shyǵarmalardyń avtory jóninde derek keltiredi. Sonymen birge onyń 1960 jyly keńes jazýshylarymen birge AQSh-tyń keı shtattarynda arnaıy saparda bolǵanyn, eline qaıtyp barǵan soń, suhbattarynda Nıý-Iorktegi záýlim ǵımarattarǵa qyzyqqanyn aıtty degendi de qosady.
Qalaı desek te, Amerıka topyraǵyna eń alǵash tabany tıgen qazaq jazýshysy Muhtar Omarhanuly ekeni shyndyq. Onyń arnaıy sapary týraly AQSh qoǵamy men baspasózi habardar. Sol úshin de alpaýyt basylym ol jóninde arnaýly qazanama jarııalap, kúlli álem jurtyna qazaqtyń bir uly jazýshysy myna dúnıeden kóshkenin habarlaǵanynyń ózi úlken qurmettiń, aıyryqsha iltıpattyń belgisi. Tipti, «The New York Times» Muhtar Áýezovtiń sýretin de birge jarııalaǵany kóńilimizge qýanysh syılaǵandaı boldy. Bul degenimiz, ótken ǵasyrdyń 60-jyldarynyń ózinde AQSh qoǵamynyń, ádebı ortasynyń qazaq jazýshysyn moıyndap, oǵan nazar aýdarǵanynyń dáleli bolmaq. Bylaısha aıtqanda, Áýezovtiń de Amerıka jurtyna áser qaldyrǵany daýsyz. Ol týraly alpaýyt eldiń baspasózderi ártúrli maqalalar jarııalǵan da shyǵar, al ázirge bizdiń qolymyzǵa túskeni – osy bir qazanama.
