Foto: Senattyń baspasóz qyzmeti
Senattyń baspasóz qyzmetiniń málimetinshe, depýtat Aqsý qalasynyń áleýmettik jáne sport salasynyń ujymdarymen, sondaı-aq Malaısary kentiniń turǵyndarymen kezdesý barysynda AES qurylysy jobasynyń strategııalyq mańyzy týraly túsindirý jumystaryn júrgizdi. Ol óz sózinde atalǵan jobanyń elimizdiń energetıkalyq táýelsizdigin qamtamasyz etýde mańyzy zor ekenin atap ótti.
«AES salý – Qazaqstannyń energetıkalyq qaýipsizdigin nyǵaıtýǵa baǵyttalǵan strategııalyq qadam. Prezıdent mańyzdy sheshimder qabyldady jáne azamattardyń pikirin eskere otyryp, jalpyulttyq referendým ótkizýdi maquldady. Bul ár daýysqa mán beriletin «Halyq únine qulaq asatyn memleket» tujyrymdamasynyń iske asýynyń jarqyn mysaly», dedi senator.
Depýtat sondaı-aq halyqtyń bir bóligi endi qolǵa alynǵaly otyrǵan jańa salalarǵa qatysty alańdaýy múmkin ekenine nazar aýdardy. Osy oraıda jobanyń negizgi jaqtaryn jan-jaqty túsindirip, turǵyndardyń kókeıkesti saýaldaryna jaýap berdi. Ol azamattardy referendýmǵa belsendi qatysýǵa shaqyrdy.
Aqsý qalasy men Malaısary aýylynyń turǵyndary Prezıdenttiń bastamalaryna qoldaý bildirip, jobany júzege asyrýǵa qatysty óz usynystary men tilekterin bildirdi. Kezdesý barysynda elimizdiń turaqty damýyn qamtamasyz etý úshin árbir azamattyń sanaly tańdaýynyń mańyzdylyǵy aıtyldy.
