Ájelerimiz nemerelerine jalyqpaı aıtatyn «Jalǵyz kózdi dáýden» bastap, «Bota týraly ertegi», «Bir qalyńdyqqa úsh kúıeý», «Salaqbaı men túlki», «Sıqyrly baq», «Aldar kóse men baı», «Otynshynyń qyzy», «Aqyldy ury», «Er Qosaı batyr», «Aqymaq qasqyr» sııaqty qazaq ertegileri aǵylshyn tiline sapaly aýdarylyp, Batys jurtynyń rýhanııatyna da óz úlesin qosqanyn ańǵardyq. Bizdi qyzyqtyrǵany Merı Loý Maseı atalǵan eńbeginde Batys oqyrmanyna ózi jınap-terip, aýdarǵan qazaq ertegileri túsinikti bolý úshin árqaısysyna óz mazmunyna saı qystyrma sýretter berip, kitaptyń mazmunyn baıyta túsipti.
Aýdarmashy retinde Merıdiń ár isine uqyptylyǵy sonsha, keı qazaqsha ataýlardy túpnusqada berýge qulshynǵan. Mysaly, «Aqyldy ury» atty ertegide «ómir-zaıa» atty juldyz atyn qazaqsha úlgide «Omir-Zaya» degen ataýmen alǵan.
Osy sátte Merı Loý Maseı kim boldy eken degen zańdy suraq týady. Ol – amerıkalyq jazýshy, zertteýshi. Júıke aýrýy sebebinen Fıladelfııa shtatyndaǵy qonaqúıdiń terezesinen sekirip, jan tapsyrǵan. Bárin biletin ınternet bizge ol haqynda osyndaı ǵana shaǵyn aqparat beredi. Bir anyǵy, ol biz sóz etip otyrǵan kitapty jazýǵa ótken ǵasyrdyń alpysynshy jyldary burynǵy keńes odaǵyna qarasty elderge arnaıy saparmen kelgendigi. Sol saparynyń nátıjesinde ol qazaq mádenıeti men ádebıetin Batys álemine nasıhattaıtyn «Dala ertegileri» atty kitabyn rýhanı mura retinde qaldyrdy.
Bir qyzyǵy, avtor osy kitabynyń alǵysózinde: «Bul kitapqa engen ertegilerdiń keıbiri Eýropada ǵasyrlar boıy tanymal bolǵan halyqtyq ertegilerdiń nusqalary degim keledi, múmkin, olardyń shyǵý tegi Shyǵys elderi shyǵar. Mysaly, «Qańbaq shal» ertegisi aǵaıyndy Grımmderdiń «Kishkentaı ójet tiginshi» atty ertegisiniń bir nusqasy deýge bolady. Tipti bul erteginiń júzdegen túri bar, bizge Azııadan kelgen bolýy da yqtımal. Al «Salaqbaı men túlki» ertegisiniń kóne nusqasy bar ári ol el arasynda keń taralǵan. Eýropada, Sibir halyqtarynda, Úndistanda odan ary Shyǵysta osy saryndas ertegi nusqasy kóp kezdesedi. Bul ertegi Batysqa «Etik kıgen mysyq» degen atpen belgili. Sonymen birge, «Segizbaı men kishkentaı qyz» jáne «Sıqyrshy áıel» ertegileri Úndistanda jazbasha túrde óte erte kezden beri saqtalǵan ertegilerdiń nusqalary degim keledi. Qazaqtyń janýarlar týraly ertegileri shyntýaıtynda, orystyń yqpalyn kórsetedi, ertegilerdiń jelisi orystyń janýarlar ertegilerine uqsas. Izgilik pen ıýmordy ushtastyrǵan bul ertegiler dalalyq kóshpelilerdiń ómiri, olardyń ózderine táýeldi janýarlarǵa degen sheksiz súıispenshiligin beıneleıdi», dep jazypty.
«Baıaǵyda bir baı bolypty, tórt túligi saı bolypty» dep bastalatyn qazaq ertegileri qazaqpen birge týyp, dalalyq mádenıet retinde qalyptasqanyn búkil álem biledi. Al qazaqtyń 19 ertegisin aǵylshyn tiline aýdaryp, kitap retinde jarııalaǵan avtordyń keı ertegimizge joǵarydaǵydaı túsinikpen qaraýynda bir sebep bar ma, kim bilsin! Degenmen onyń baı mádenıetimizdi az da bolsa, ózge jurtqa tanystyrǵanyna kóńil qýanady.
