Osydan úsh jyl buryn oblysta nebary tórt-aq ınklıýzıvti qoldaý kabıneti bolsa, búginde onyń sany 24-ke jetken. Bıyl Áýlıekól, Fedorov, Jangeldi, Qamysty aýdandarynda taǵy tórt kabınet ashyldy. Jańa kabınetterdi qajetti dúnıelermen jabdyqtap, balalardyń ıgiligine ótkizip berý úshin óńir bıýdjetinen 34 mln teńge bólingen.
Mundaı kabınetterdiń, ásirese shalǵaı aýyl mektepterinde ashylyp jatqany qýantady. Shalǵaı eldi mekenderdegi ınklıýzııany qoldaý synyptary balanyń alystaǵy qalaǵa sabylmaı-aq, óz aýylynda, ata-anasy men baýyrlarynyń janynda bilim alýyna, qatarlastarymen aralasyp, kópshilik ortaǵa tez beıimdelip ketýine múmkindik týǵyzyp otyr.
Taıaýda Fedorov aýdanyndaǵy Abaı mektebinde taǵy bir ınklıýzııany qoldaý kabıneti ashyldy. Kabınette pedagog-psıholog, logoped-muǵalim, pedagog-assıstent jumys isteıdi. Mamandardyń aıtýynsha, munda erekshe balalardyń mektep ómirine aralasyp ketýine bar jaǵdaı jasalǵan. Balalardy beıimdeýge arnalǵan zamanaýı jabdyqtar, trenajerler, sportpen aınalysatyn, demalatyn, balany sergitetin arnaıy oryndar bar.
«Kabınettiń ashylǵanyna kóp bolǵan joq. Bárimiz qýanyp jatyrmyz. Osynyń arqasynda balamyz qyrkúıek aıynan beri qatar-qurbylarymen birge oqyp, aralasyp, dos taýyp jatyr. Kópten kútken armanymyz osy bolatyn. Balama da unaıdy. Mektepte jasalyp jatqan jan-jaqty qoldaý óz nátıjesin beredi. Balamyzdyń densaýlyǵynyń jaqsarýyna, sapaly bilim alýyna paıdasyn tıgizedi dep oılaımyn», deıdi Abaı mektebinde bilim alyp jatqan erekshe balanyń anasy Ásel Sultan-Májıt.
Búginde óńirdegi jıyrmadan astam ınklıýzııany qoldaý kabıneti erekshe bilim alýǵa muqtaj 280 balaǵa jan-jaqty kómek kórsetedi.
Qostanaı oblysy
