Dese de muqtaj jandarǵa shynymen kómektesip júrgender de bar. Máselen, 11 jasar Álıhan serebral sal aýrýyna shaldyqqan. Anasy balasymen birneshe ret shetelge baryp qaralypty. Qaıda bolmasyn, attap bassań, «aqsha qajet etetin qymbatshylyq zamanda dertine daýa bar, alaıda qarajat joq» deıdi. Aıtýynsha, aı saıyn Álıhannyń emine 600 myń teńgege deıin qarajat ketedi eken. Jubaıynyń jalaqysy shaılyǵynan artylmaıtyn otbasyna qorlardyń biri tek qarjylaı ǵana emes, azyq-túlikpen de qamtamasyz etken.
«Balamda serebral sal aýrýy. Bul dıagnozben balada esh úzilis bolmaýy kerek. Áıtpese súıegi qısaıa bastaıdy. Osy kisilerdi taýyp Qaırat myrzanyń arqasynda balam qorǵaýly. Sol kisilerden kómek suraǵanmyn. Allaǵa shúkir. Bir ret emes, úsh ret kómegin aldym. Qarjylaı aldym. О́ıtkeni balama qarjylaı kómek kerek. Balanyń járdemaqysy ózine jetpeıdi», deıdi Aısulý Qaýkenova.
KTK jazǵandaı, qor ókilderi sal aýrýyna, aýyr dertke shaldyqqan 350-den astam balanyń emine qarjylaı qoldaý kórsetip keledi eken. Bul qor elimizdiń tórt qalasynda bar.
«Qoǵamdyq qorymyz bir otbasyna naqty soma daıyndap qoıdy. Keıde ózderi suraıdy, osynshama soma kerek dep. Sol kezde qansha ýaqytta jınap bolamyz, sodan keıin kelesi balaǵa jınap beremiz. Bir balaǵa bir aptada jınap qoıamyz. Keıbirine bir aıda jınaımyz, keıbirine tórt apta ketedi. Kezekpen. Ol jerde esep beriledi, býhgalterııaǵa barady ǵoı. Aktimen qabyldap alamyz», deıdi «Halyqaralyq dúnıe rýhanııat» qoǵamdyq qorynyń prezıdenti Janbolat Orynbasar.
Atalmysh qor 6 jyldan beri jumys istep keledi. Munda eriktilerden jasaqtalǵan arnaıy top ta bar. Olar naýqas búldirshinderdiń sýreti japsyrylǵan qorapshalarmen qoǵamdyq oryndardy aralap, kópshilikti saýaby mol, ıgi is jasaýǵa shaqyrady.
«Naýqas sábılerdiń emine kómek berip jatyrmyz. Erekshe balalardyń. Osyndaı «Halyqaralyq rýhanııat» qorymen birge is-sharalar uıymdastyramyz. Sol is-sharalarǵa atsalysyp, kómektesip júremin. Qoǵamdyq oryndardan, bazarlardan nemese avtobýstardan. Qoǵamymyzda qanshama naýqas sábı kóp, solardyń emine men de kómekteskim keledi», dedi erikti Nurly Sarybaı.
Dese de erekshe balalardyń atyn jamylyp, zańsyz jolmen aqsha jınap júrgen toptar da joq emes. Jaqynda osy másele Senat otyrysynda da kóterilgen. Endi elimizde avtobýstyń ishinde aqsha jınaıtyn eriktilerdi polıseıler tekseredi.
«Qarap kóreıik, zertteıik. Biraq jaqsylyq jasaý ár adamnyń óz erkinde. Aqsha jınap júrgender eshkimdi bopsalamaıdy. Bergińiz kelse — beresiz, bergińiz kelmese — bermeısiz. Bul birinshi másele. Ekinshi másele — eriktilerdiń artynda alaıaqtardyń turýy da múmkin. Eger sondaı jaǵdaı kezdesip jatsa, onda ol bizdiń quzyretimizde», degen edi Ishki ister mınıstriniń orynbasary Igor Lepeha.
Ishki ister mınıstrligi qoǵamdyq oryndarda aqsha jınap júrgen eriktilerdi endi jiti teksermek. О́ıtkeni qarajat jınaıtyndardyń kóbi — jasóspirim. Sondyqtan túsindirý jumysyna olardyń ata-analary da tartylady. Al alaıaq bolyp tanylǵandarǵa naqty qandaı jaza qoldanylatyny ázirge belgisiz.
