Batys Qazaqstan oblysynyń ákimi Narıman Tóreǵalıev qalalyq máslıhattyń kezekten tys sessııasyna qatysyp, ákim laýazymyna kandıdatty usyndy. Depýtattar ony qoldady.
«Murat Bolatuly biraz jyldan beri Oral qalasynda jáne oblysymyzǵa qarasty aýdandarda jumys istedi. Barlyq máselemen tanys. Eń bastysy, qala turǵyndary ony jaqsy biledi. Jınaqtalǵan tájirıbesi men bilimi oǵan qalanyń áleýmettik-ekonomıkalyq damýynda óziniń áleýetin iske asyrýǵa kómektesedi dep senemin», dep atap ótti óńir basshysy.
Narıman Tóreǵalıev jańa ákimniń aldyna oblys ortalyǵynyń ınfraqurylymyn damytýdy jalǵastyrý boıynsha birqatar mindet qoıdy.
Murat Baımenov 1969 jyly dúnıege kelgen. Ár jyldary BQO qarjy basqarmasy bastyǵynyń orynbasary, Shyńǵyrlaý jáne Zelenov (qazirgi Báıterek) aýdany ákimderiniń orynbasary, BQO ákimi apparatynyń ekonomıkalyq taldaý, ishki baqylaý jáne memlekettik qyzmetter monıtorıngi bóliminiń meńgerýshisi, BQO energetıka jáne TÚKSh basqarmasy basshysynyń orynbasary, «Jaıyq jylý qýat» AQ bas dırektory qyzmetterin atqarǵan.
2020 jyldyń qazan aıynan bastap qazirgi ýaqytqa deıin Báıterek aýdany ákiminiń orynbasary qyzmetin atqardy.
Batys Qazaqstan oblysy
