Kóshbasshylyq oqý kýrsynyń ashylý saltanatynda NU prezıdenti, professor Vakar Ahmad atalǵan ýnıversıtettiń elimizdegi joǵary bilimdi qoldaý men damytý boıynsha óz mindetin belsendi atqaryp otyrǵanyn jetkizdi.
«Joǵary bilim berý mektebi (GSE) osy mindetti oıdaǵydaı oryndap, 28 000-nan astam qatysýshyǵa birqatar tıimdi baǵdarlama usynady. Sonyń ishinde kóshbasshylyq pen kásibı damý baǵdarlamasyn erekshe aıtýǵa bolady. Bul jańa bastama joǵary oqý oryndaryn odan ári damytyp, oǵan qajetti quraldar men bilim beredi», dedi ol.
Bir jaǵynan, «Dekandar mektebi» baǵdarlamasyna óńirdegi joǵary oqý oryndary qyzyǵýshylyq tanytqan. Aıtalyq, oǵan qatysýǵa elimizdegi pedagogıkalyq, tehnıkalyq, medısınalyq jáne jekemenshik ýnıversıtetterimen birge Qyrǵyzstan joǵary oqý oryndaryn qosqanda 170-ten astam ótinim túsken. Bul baǵdarlamanyń aımaqtyq deńgeıdegi mańyzyn kórsetedi.
«Baǵdarlama jan-jaqty qajettilikterdi taldaý negizinde ázirlendi. Sonyń aıasynda otandyq joǵary oqý oryndaryndaǵy dekandardyń laýazymdyq sıpattamasy muqııat baǵalandy. Sondaı-aq «Kozybayev University», «Narxoz», «Kimep» jáne Qoja Ahmet Iаsaýı atyndaǵy halyqaralyq qazaq-túrik ýnıversıteti sekildi oqý oryndarynyń akademııalyq kóshbasshylarymen fokýs-toptyq talqylaý júrgizildi. Bul taldaýlar baǵdarlamany qazirgi dekandardyń aldynda turǵan negizgi máselelerdi sheshýge baǵyttaýǵa múmkindik berdi», dedi NU vıse-provosty, Joǵary bilim mektebiniń dekany, PhD Aıda Saǵyntaeva.
Aıta keteıik, baǵdarlamaǵa qatysý tegin. Ǵylym jáne joǵary bilim mınıstrligi Joǵary jáne joǵary oqý ornynan keıingi bilim komıteti tóraǵasynyń orynbasary Gúljan Jarasovanyń aıtýynsha, atalǵan kýrs jumys pen basqarý tásilin qaıta qaraýǵa kómektespek.
«Joǵary oqý oryndaryndaǵy dekandar men kafedra meńgerýshileri stýdenttermen tyǵyz baılanysta jumys istep, olardyń ǵylymı damýyna jaǵdaı jasaıdy. Sondyqtan joǵary bilimniń sapasyn arttyrýǵa dekan men dekanatqa basa nazar aýdarý kerek dep esepteımiz. Osyndaı ózgeristerdi utymdy uıymdastyra alsaq, joǵary bilim sapasyna áser ete alamyz», deıdi G.Jarasova.
Baǵdarlamadaǵy kóshbasshylyq jáne menedjment modýli aıasynda «Dekan kúni» semınary josparlanǵan. Onda qatysýshylar akademııalyq deńgeıine baılanysty toptarǵa bólinip, NU fakýltetin, mektep nemese kafedra basqarýdyń praktıkalyq tájirıbesin úırenedi.
M.Ospanov atyndaǵy Batys Qazaqstan medısına ýnıversıtetiniń jalpy medısına fakýltetiniń dekany Talǵar Ábilov baǵdarlamaǵa kóńili tolatynyn aıtady.
Bir sózben aıtqanda, «Dekandar mektebi» baǵdarlamasy elimizdegi joǵary bilim berý salasyna aıtarlyqtaı ózgeris ákelmek.
