Kollaj: egemen.kz
Memleket basshysy Qasym-Jomart Toqaev «2024 jylǵy 6 qazanda respýblıkalyq referendým ótkizý týraly» Jarlyqqa qol qoıǵan edi.
«Qazaqstan Respýblıkasy Konstıtýsııasynyń 44-babynyń 10) tarmaqshasyna jáne «Respýblıkalyq referendým týraly» Qazaqstan Respýblıkasy Konstıtýsııalyq zańynyń 18-babyna sáıkes QAÝLY ETEMIN: 2024 jylǵy 6 qazanda respýblıkalyq referendým ótkizilsin», delingen Jarlyq mátininde.
Referendýmǵa qandaı saýal shyǵarylady?
Bıýlletenderde «Siz Qazaqstanda atom elektr stansııasyn salýǵa kelisesiz be?» degen suraq qoıylady.
Referendým saǵat 07:00-den 20:00-ge deıin ótkiziledi, al daýys berý nátıjeleri 7 kún ishinde jarııalanady.
Kim daýys bere alady?
Daýys berýge Qazaqstan Respýblıkasynyń 18 jasqa tolǵan barlyq azamaty qatysa alady. Qazirgi ýaqytta 12 176 968 adam daýys berý quqyǵyna ıe.
Referendým barysynda jalpy 10 327 saılaý ýchaskesi jumys isteıdi. Qazaqstan azamattarynyń tirkelgen jeri boıynsha daýys berý ýchaskesiniń sany - 9 709, ýaqytsha ýchaske - 618. Shetelde júrgen otandastarymyz úshin 63 elde 78 ýchaske ashylady. Daýys berýshilerge yńǵaıly bolý úshin aýmaqtyq referendým komıssııalary ózge ýaqytty belgileýi múmkin.
Buǵan deıin soǵys qımyldary ótip jatqan Lıvanda daýys berý ýchaskesi ashylmaıdy degen sheshim qabyldanǵan edi.
El azamattary qaı jerde daýys bere alatynyn qalaı bile alady?
Ár azamat óz daýys berý ýchaskesi qaıda ornalasqanyn úıden shyqpaı-aq bile alady. Ol úshin referendum.gov.kz arnaıy saıty iske qosyldy. Daýys berý ýchaskesi týraly aqparat alý úshin kelesi qadamdardy oryndaý qajet:
- referendum.gov.kz saıtyna kirińiz.
- Turǵylyqty jerińizdi kórsetińiz.
- JSN (jeke sáıkestendirý nómiri) engizińiz.
- «Tabý» batyrmasyn basyńyz.
Derekterińiz eńgizilgennen keıin, júıe ýchaskeńiz týraly aqparat usynady.
Referendýmda daýys berý tártibi qandaı?
- Bıýlleten jeke basyn kýálandyratyn qujatty kórsetken kezde beriledi.
- Referendým ýchaskesinde osy ýchaskedegi tizimge engizilgen azamattar, sondaı-aq esepten shyǵarý kýálikterin usynǵan adamdar daýys bere alady.
- Respýblıkalyq referendýmǵa qatysýǵa quqyǵy bar árbir azamat jeke daýys beredi.
- Bıýlleten jasyryn daýys berýge arnalǵan kabınada toltyrylady.
- Belgi daýys beretin jaýap nusqasynyń oń jaǵyndaǵy bos sharshyǵa qoıylady.
- Bıýlletendi óz betinshe toltyrýǵa múmkindigi joq azamat ózi senetin adamnyń kómegin paıdalanýǵa quqyly.
- Toltyrylǵan bıýlletendi mindetti túrde daýys berý jáshigine salý qajet.
Úıde daýys berýge bola ma?
Densaýlyq jaǵdaıyna, otbasydaǵy naýqas adamnyń kútimine, múgedektigine nemese jasyna baılanysty daýys berý ýchaskesine bara almaıtyn azamattar úıde otyryp daýys bere alady. Ol úshin aldyn-ala ýchaskelik daýys berý komıssııasyna júginý qajet.
Aıta keteıik, bıýlletender daýys berý ýchaskelerine daýys berý kúnine deıin 1 kúnnen keshiktirilmeı jetkiziledi.
5 qazan - únsizdik kúni. Referendým boıynsha úgit-nasıhat jumystary daýys berý kúnine deıin túngi saǵat 00:00-de aıaqtalady.
6 qazan - referendým kúni. Daýys berý saǵat tańǵy saǵat 7:00-den keshki saǵat 20:00-ge deıin júrgiziledi.
Daýys 12 saǵattyń ishinde sanalady. Al óńirlerge Ortalyq referendým komıssııasyna daýys berý qorytyndysynyń jıyntyq hattamasyn jınaýǵa jáne jetkizýge 2 kún beriledi.
Ortalyq komıssııa 7 kún ishinde referendýmnyń qorytyndysyn belgilep, resmı habarlamany BAQ-ta jarııalaıdy.
Referendýmǵa daıyndyq qalaı júrip jatyr?
Respýblıkalyq referendýmǵa daıyndyq aıasynda Ortalyq referendým komıssııasynyń músheleri 11 óńirge baryp, respýblıkalyq referendýmǵa aýmaqtyq jáne ýchaskelik komıssııalardyń daıyndyǵyn tekserdi. Odan bólek oqytý semınarlary da ótkizildi.
ORK Tóraǵasynyń orynbasary Konstantın Petrov Soltústik Qazaqstan, Qostanaı oblystary men Almaty qalasyna bardy. Al ORK hatshysy Muhtar Erman Jambyl, Túrkistan oblystary men Shymkent qalasynda boldy. ORK músheleri Sabıla Mustafına, Asylbek Smaǵulov jáne Anastasııa Shegorsova Jetisý, Ulytaý, Aqmola, Qyzylorda jáne Shyǵys Qazaqstan oblystarynda respýblıkalyq referendýmǵa daıyndyǵyn tekserdi.
Odan bólek, Senat jáne Májilis depýtattary óńirlerge attanyp, el azamattarymen tildesip, AES-tiń máni men mańyzy týraly túsindirý jumystaryn júrgizip júr.
