foto halyqline.kz
Depýtat áleýmettik jelidegi qaýipti oıyndar men qatygezdikti nasıhattaıtyn kontentter jasóspirimderdiń sanasyn ýlap jatqanyn atap ótti.
«Áleýmettik jelige baqylaýdy kúsheıtý kezek kúttirmeıtin mindet dep esepteımin. Jeliniń keri áserine kóz jumyp qaraý – urpaqtyń bolashaǵyna balta shabýmen birdeı. Quqyq qorǵaý organdarynan zańnamalyq sharalardy, ásirese jasóspirimderge arnalǵan messendjerlerdegi kontenttiń gıgıenalyq normalaryn qataıtýdy talap etetin ýaqyt jetti. Mádenıet jáne aqparat mınıstrligi, Bas prokýratýra jáne Sıfrlyq damý mınıstrligi balalarǵa qaýipti kontentti anyqtaý jáne zertteý úshin vedomstvoaralyq jaýapkershilikti kúsheıtýi kerek», dedi Súleımenova.
Onyń aıtýynsha memlekettik organdar Parlament qabyldaǵan zańnamalyq sheshimderdiń oryndalýyn qatań qadaǵalaýy tıis, sonymen qatar árbir ata-ana balalarynyń ınternette ótkizetin ýaqytyn baqylaýǵa jáne olardyń zııandy kontentten qorǵalýyn qamtamasyz etýge mindetti.
«Balalarǵa zııandy aqparatty avtomatty túrde anyqtaıtyn jáne bloktaıtyn jańa tehnologııalar men júıeler kerek. Sondaı-aq oqýshylarǵa jeliden keletin qaýipti zerdelep, oqý baǵdarlamasyna sıfrlyq saýattylyqty arttyrý pánin engizý qajet, dedi depýtat.
