Foto: N.Baıbýlın
Senattyń baspasóz qyzmetiniń málim etýinshe, Máýlen Áshimbaev óz sózinde Iаsaýıdiń esimi biregeı tarıhı tulǵa retinde búkil álemge belgili ekenin atap, halyqaralyq konferensııa ótkizý erekshe mánge ıe ekenin aıtty. Sondaı-aq Senat Tóraǵasy ǵulamanyń adamzatty izgilik pen meıirimdilikke shaqyratyn eńbekterin jan-jaqty zerdeleýge Memleket basshysy únemi basa mán berip kele jatqanyna toqtaldy.
«Prezıdentimiz Ulttyq quryltaıdyń otyrysynda Islam dininiń Uly dala tórinde jáne túrki áleminde taralyp, tamyr jaıýyna orasan zor úles qosqan Qoja Ahmet Iаsaýıdiń muralaryn tereń zerdelep, dáripteýge aıryqsha nazar aýdarýdy tapsyrdy», dep, Senat Spıkeri konferensııaǵa qatysýshylarǵa iltıpat bildirdi.
Máýlen Áshimbaev sonymen qatar, Iаsaýı qazaq halqynyń ǵana emes, baýyrlas elderdiń birligin bekemdeý isinde mańyzdy ról atqaratyn tutas túrki álemine ortaq tulǵa ekenin aıtty. Sondaı-aq ol oıshyldyń eńbegi – rýhanı dıalog pen mádenıetaralyq jáne dinaralyq kelisimniń altyn kópiri bolatynyna senim bildirdi.
«Qoja Ahmet Iаsaýı túrki jerinde ıslam órkenıetiniń damýyna zor yqpalyn tıgizdi. Iаsaýıdiń «Dıýanı hıkmet» atty eńbegi – barshamyz úshin qundy jádiger. Ol ósıetterimen adamzatty izgilikke, baýyrmaldyqqa, adal eńbekke shaqyrady. Iаsaýıdiń hıkmetteri beıbitshilik pen sabyrlyqqa taban tireıdi. Ol óziniń shyǵarmalarynda adamgershilik pen ımandylyqty ulyqtap, halyqty tatýlyqqa úndeıdi. Osy rette munyń bári Astanada ótkizilip kele jatqan Álemdik jáne dástúrli dinder kóshbasshylary Seziniń ıdeıalarymen úndes ekenin aıta ketken abzal», dedi Máýlen Áshimbaev.
Aýqymdy is-sharaǵa depýtattarmen birge Mádenıet jáne aqparat mınıstrliginiń ókilderi, sheteldik jáne otandyq túrkitanýshy ǵalymdar, shyǵystanýshylar, sarapshylar, zııaly qaýym ókilderi, qoǵam qaıratkerleri qatysty.
