Sóıtsek, osylaı ushý arqyly qustar energııa únemdeıdi eken. Aldyńǵy qatardaǵy qus qanattaryn qaǵyp, artyndaǵylarǵa aýa aǵynyn týdyrady. Sonda artqy qatardaǵylar az kúsh jumsap, ońaıyraq ushady. Kósh basyndaǵy qus sharshaǵanda, keıingilerimen aýysady. Osy tásil avıasııada «aerodınamıkalyq súıreý» dep te atalady.
Qutqarýshy qaz
Jaqynda kósheden jaraly kógershin kórdim. Nan tabý men mán tabýdyń arasynda sabylyp júrip, eshteńe istemesten, ótip kettim. Al keıin myna bir oqıǵany oqyp, qatty ókindim...
2021 jyly Londonda erekshe oqıǵa bolǵan eken. Jaraly qaz ózine kómek keregin bildirý úshin adamdarǵa jaqyndaǵan. Sol jerde júrgen dáriger Djoanna Trıgano veterınarǵa aparmaq bolady. Qaz tańǵalarlyq túrde dárigerdiń artynan erip, klınıkaǵa barǵan, emdelgen. Keıinnen dáriger Djoanna jumys isteıtin aýrýhanaǵa aýyr jaraqat alǵan adam túsedi. Eń ǵajaby, ol adam «Men kóshede qansyrap jattym, kómekke adamdardy bir qaz shaqyrdy. Qaz adamdardy maǵan qaraı qýdy» degen. Djoanna kishkentaı qutqarýshynyń ózi emdegen qaz ekenine esh kúmándanbady.
Qurmetke bólengen kógershin
«El tilegin alyp ush, adamzattyń baǵyna. Qara bultty jaryp ush, muhıttyń arǵy jaǵyna». Nyǵmet Baımuhamedov jazǵan osy joldardy oqyǵanda, ándete jóneletinińizge shúbám joq. Al osy ándi jazǵan Ahmet Jubanov myna bir oqıǵany bildi me eken...
Birinshi dúnıejúzilik soǵys kezinde amerıkalyq sarbazdardyń bir toby fransýz jerinde qorshaýda qalady. Olar baılanys ornatý úshin Sher Amı atty kógershinge hat berip, senim artqan. Kógershinge jolda oq tıedi. Soǵan qaramastan, ol habardy jetkizip, sarbazdardy qutqarýǵa kómektesedi. Osy erligi úshin qanatty baılanysshy «Fransııanyń áskerı qurmet belgisi» marapatyna ıe bolǵan.
