«Azamattarǵa arnalǵan úkimet» memlekettik korporasııasynyń baspasóz qyzmeti habarlaǵandaı, bul kúni 10 myńnan astam saılaý ýchaskesiniń 196-synda halyqqa qyzmet kórsetý ortalyǵynyń qyzmetkerleri jumys isteıdi.
Olar turǵylyqty jeri joq azamattardy saılaý ýchaskesiniń ornalasqan mekeni boıynsha tirkeıdi. Bul sheshim barlyq qazaqstandyqtardyń konstıtýsııalyq saılaý quqyǵyn júzege asyrýy úshin qabyldandy.
Referendým ótetin kúni HQO qyzmetkerleri saǵat 7.00-den 20.00-ge deıin saılaý ýchaskelerinde otyryp, azamattardy bir táýlikke tirkeýdi qamtamasyz etedi. Tirkelmegen azamat mektepke, kolledjge nemese aýrýhanaǵa daýys berý úshin barsa, ol tikeleı osy mekemege tirkeledi. 7 qazanda tirkeý avtomatty túrde joıylady jáne ótinish berýshi turǵylyqty jeri boıynsha qaıta tirkelýi kerek.
Turǵylyqty jeri boıynsha tirkelgen qazaqstandyqtar referendým kúni halyqqa qyzmet kórsetý ortalyǵy arqyly tirkele almaıdy, óıtkeni olar turǵylyqty mekeni boıynsha daýys berýi kerek.
