Sýrette: daýys berý ýchaskesine kelgen «Altyn adam»
Osy kúni oblysta referendýmnyń 643 ýchaskesi qurylyp, jumys istep jatyr. Respýblıkalyq referendýmǵa qatysýǵa quqyǵy bar azamattardyń jalpy sany 994 367 adamdy quraıdy.
Chempıondar otbasy daýys berdi
Daýys berý ýchaskesine UFC kúreskeriniń qaryndasy Sora Rahmonova kúıeýi Nursultan Orynbasarovpen birge keldi. Sora – aralas jekpe-jekten chempıon jáne qazaq áıelderiniń arasynda qoıan-qoltyq urystan úsh dúrkin álem chempıony. Onyń jubaıy – oblystyq máslıhattyń depýtaty ári grepplıngten Azııa chempıony. Sportshylar daýys berý arqyly elimizdiń abyroıyn tek rıngte ǵana emes, sondaı-aq onyń damýyna belsene qatysý arqyly da qorǵap jatqandaryn kórsetti.
Eki sportshy da referendýmǵa qatysýdy mindeti dep esepteıdi jáne ár daýys óńirdiń bolashaǵy úshin mańyzdy ekenin aıtady. Sonymen qatar referendýmǵa osyndaı tanymal sportshylardyń qatysýy basqa adamdardy, ásirese jastardy, azamattyq belsendilikke yntalandyrady.
Kegende jármeńke ótti
Kegendegi №558 daýys berý ýchaskesiniń janynda aýyl sharýashylyǵy ónimderi jármeńkesi uıymdastyrylyp, jumysyn qyzdyra tústi. Jergilikti fermerler kókónis, jemis-jıdek pen etti tómendetilgen baǵamen usynyp, turǵyndar arasynda úlken qyzyǵýshylyq týdyrdy.
Turǵyndar daýys berýge ǵana emes, sonymen qatar sapaly ónimderdi qoljetimdi baǵamen satyp alýǵa da kelip jatqany baıqalady. Al taýarlaryn usynǵan fermerler ónimderin satyp qana qoımaı, jerlesterimen qarym-qatynas ornatýǵa tamasha múmkindik ekenin aıtty. Satyp alýshylar baǵalardyń ádettegiden áldeqaıda tómen ekenin jetkizdi. Bul turǵyndardyń birtutas qaýymdastyqtyń múshesi retinde sezinýge múmkindik berdi. Olar elimizdiń damýy úshin ıgi is jasaýǵa árqashan daıyn ekenin alǵa tartty.
«Altyn adam» óz tańdaýyn jasady
Qazaqstan arheologııasynyń tarıhynda kóptegen tańǵajaıyp mura bar, olardyń biri – Almaty oblysynda tabylǵan «Altyn adam». Al Eńbekshiqazaq aýdany sol «Altyn adamnyń» atamekeni. Osyǵan oraı, Eńbekshiqazaq aýdanynyń mádenıet úıindegi №123 saılaý ýchaskesinde «Altyn adam» kıimin kıgen Jasulan Seıdazımov óz tańdaýyn jasady.
«Búgin elimizde tarıhı sheshim qabyldanyp jatyr. Bul árıne barlyǵymyzdyń bolashaǵymyz úshin mańyzdy. Sondyqtan bul máselede týǵan topyraǵymyzdyń ótken tarıhy men ondaǵy órkenıet izin jańǵyrtýmen qatar, ózindik azamattyq ustanym bildirýdiń erekshe tásilin kórsetkim keldi. Men qashanda qoǵamdy ózgertý men elimizdi órkendetýge baǵyttalǵan sheshimderge belsene ún qatyp kelemin», deıdi kásipker Jasulan Seıdazımov.
Alǵash ret daýys berdi
Alataý qalasynda úsh jas ózderiniń 18 jasqa tolýyn atap ótip, alǵash ret daýys berýge qatysty. №379 ýchaskede olardy referendým komıssııasynyń músheleri quttyqtap, ómirlerindegi alǵashqy bıýlletenderdi tabys etti.
Azamattar elimizdiń bolashaǵyna jaýapkershilikpen qaraıtynyn, mundaı sharalarǵa qatysýdy paryz sanaıtyndaryn aıtty. Olar óz qalasy men Qazaqstannyń órkendeýine belsendi túrde aralasýdy qalaıdy. Bul daýys berý sonyń bastamasy ekenin jetkizdi.
Referendým komıssııasynyń músheleri de osy oqıǵanyń mańyzdylyǵyn atap ótip, jastardyń óz qurdastaryna úlgi bolatynyna basa nazar aýdardy.
Avtosherý ótti
Qonaev qalasynda retro-avtomobılder sherýi ótti. Osylaı qala turǵyndary elimizdegi AES qurylysy týraly jalpyhalyqtyq referendýmǵa qoldaý bildirdi. Avtosherýdi belgili kásipker Murat Sirgebaev uıymdastyrdy.
Atalǵan sherýge qatysqan kólikterdiń árqaısysy tarıhtyń jáne mádenı muranyń bóligi sanalady. Olar tek jergilikti turǵyndardyń ǵana emes, qala qonaqtarynyń da nazaryn aýdardy. Kólikter sherýi oblys ortalyǵynyń negizgi kóshelerimen júrip, merekelik kóńil-kúı týǵyzyp, osy mańyzdy oqıǵanyń mán-mańyzyn adamdarǵa jetkizdi. Daýys berý ýchaskelerin aralap, belsendilik tanytqan azamattar saıası naýqannyń mańyzdylyǵyna toqtaldy.
«Tańǵy saǵat jetiden ózimniń daýys berý ýchaskeme baryp tańdaý jasadym. Ár mereke saıyn kórikti qalamyzda uıymdastyrylatyn mádenı is-sharalarǵa belsendi qatysamyz. Avtosherý ótkizý dástúrimizge aınaldy», deıdi sherýge qatysýshylar.
Avtosherýge qatysýshylar azamattyq ustanymdaryn kórsetý arqyly, daýys berýge kelgen árbir adamnyń esinde qalýǵa tyrysty. Birneshe kólikten jolaýshylarǵa táttiler taratty.
Ardager ata daýys berdi
Eńbekshiqazaq aýdanynda 99 jastaǵy ekinshi dúnıejúzilik soǵys ardageri Soltanbaı Jaryqbasov óziniń tirkelgen ýchaskesine baryp, tańdaýyn jasady.
Soǵys ardageri AES salýǵa qoldaý bildirip qana qoımaı, elimizdiń energetıkalyq táýelsizdigin qamtamasyz etý jolynda mundaı bastamalardyń mańyzyn atap, referendýmnyń nátıjesi elimizdiń ǵylymyna, energetıka men ekonomıkasynyń damýyna tikeleı áser etetindigin aıtty.
Báıterek aýyldyq okrýgine qarasty Alǵa aýylynda turatyn ǵasyr jasaǵan ardager Soltanbaı Jaryqbasov Eńbekshiqazaq aýdany Alǵa aýylynda dúnıege kelgen. 1943 jyldyń qańtarynda Tashkenttegi mergender kýrsynda oqyp, sáýir aıynda áskerge attanady. Zabaıkale maıdanyndaǵy 25-shi qyzyl týly mehanıkalandyrylǵan brıgadanyń quramynda 1-shi batalonynyń, 1-shi rotasynyń pýlemet bólimshesiniń komandıri bolǵan. Japondyqtarǵa qarsy soǵysqa qatysqan. Soltanbaı atamyz I dárejeli «Otan soǵysy» ordenimen jáne 1941-1945 jj. ekinshi dúnıejúzilik soǵysyndaǵy Uly jeńistiń mereıtoılyq, merekelik medaldarymen marapattalǵan.
Aporttan dám tatty
Talǵar aýdanynda referendýmǵa qatysýshylarǵa eki tonna Almatynyń aporty taratyldy. Daýys berýshiler aporttan dám tatyp, óz tańdaýyn jasady.
«Tańmen talasyp, tańdaý jasaýǵa asyqqandar arasynda men sııaqty as ishpeı kelgender de az emes. Mundaǵy qyzmetkerler muny qaperge alǵanyn kórip, «bárekeldi» destik. Almanyń dámi til úıiredi eken. Tamasha kóńil kúıdemiz», deıdi bul iske rıza bolǵan daýys berýshiler.
Almaty oblysy
