foto Almaty О́KQ
Medeý aýdanynda turatyn ardagerdiń úıine saılaý komıssııasynyń músheleri tasymaldanatyn saılaý jáshigin ákeldi. Ol ózine kórsetilgen qamqorlyqqa rızashylyq bildirip, el azamattaryn referendýmǵa belsene qatysýǵa shaqyrdy.
«Men ǵasyrlyq ómirimde kóp nárseni bastan ótkerdim. Otanym úshin kóp nárse jasadym. Jas urpaqtyń keleshegi úshin referendýmǵa qatysyp otyrmyn. Búgingideı mańyzdy kúnde el turǵyndaryn ózderiniń azamattyq jaýapkershilikterin kórsetýge shaqyramyn», dedi Vıktor Karpovıch.
Soǵys ardageri 18 jasynda maıdanǵa attanǵan. Lenıngrad áskerı baılanys ýchılıshesinde oqıdy. Vengrııada, Avstrııada shaıqastarǵa qatysyp, Vena men Chehoslovakııa shekarasyndaǵy Znaıme (Znoımo) qalasyn basyp alýǵa qatysyp, Jeńisti qarsy alady. Soǵys aıaqtalǵannan keıin oǵan aǵa serjant ataǵy beriledi.
Vıktor Karpovıch - «Qazaqstannyń eńbek sińirgen agronomy», ekonomıka ǵylymdarynyń kandıdaty, eki ret elimizdiń Joǵarǵy Keńesiniń depýtaty bolyp saılandy, Qazaqstan Kompartııasy Ortalyq Komıtetiniń múshesi boldy, kóptegen marapattarǵa ıe, onyń ishinde II dárejeli «Otan soǵysy» ordeni, «Jaýyngerlik eńbegi úshin» medali, mereıtoılyq medaldary bar.
