Mysaly, Saıram aýdany Qarabulaq aýyldyq okrýginiń №580 referendým ýchaskesinde Ekinshi dúnıejúzilik soǵysynyń ardageri Ahmedjan Anartaev óz tańdaýyn jasady. Referendýmǵa kelýshilerge, ondaǵy komıssııa músheleri men baıqaýshylarǵa aq batasyn bergen maıdanger aqsaqal 1926 jyly 10 qarashada Ońtústik Qazaqstan oblysynyń Saıram aýdanyndaǵy Qarabulaq aýylynda dúnıege kelgen. 1944 jylǵy 5 mamyrda Saıram aýdandyq áskerı komıssarıatynan áskerge shaqyrylyp, 64-atqyshtar polkinde qyzmet etti. Qatardaǵy jaýynger sheninde Polshany azat etý jolyndaǵy shaıqastarǵa, Germanııadaǵy urystarǵa qatysty. II dárejeli «Otan soǵysy» ordenimen jáne birneshe medalmen marapattalǵan.
«Eldiń bolashaǵy úshin árbir qazaqstandyq referendýmda óz daýysyn berýge mindetti. Búgingideı el eńsesin tiktegen shaqta aýyzbirligimiz myqty bolýǵa tıis», deıdi 9 balasy, 28 nemeresi, 5 shóberesi bar qart maıdanger.
Al Qazyǵurt aýdanynda «Ájeler alqasy» qoǵamdyq uıymynyń músheleri alǵashqylardyń biri bolyp, óz tańdaýyn jasady. «Ájeler alqasy» uıymynyń múshesi, Qazyǵurt aýdanynyń Qurmetti azamaty Qatıra Bekmuratova aýyldastaryn el bolashaǵy úshin mańyzy joǵary referendýmda tańdaý jasaýǵa shaqyrdy. Túlkibas aýdanynda da aq jaýlyqty ájeler óz saılaý ýchaskilerine kelip, tańdaý jasady. Sondaı-aq olar barlyq ýchaskege baryp án aıtyp, shashý shashyp, qurt-baýyrsaqtaryn saılaýshylarǵa usynyp, halyqtyń kóńil kúıin kóterdi.
Al oblys ákimi Darhan Satybaldy Túrkistan qalasyndaǵy №133 ýchaskesine baryp, óz tańdaýyn jasady. Q.A.Iаsaýı atyndaǵy HQTÝ-degi №133 daýys berý ýchaskesi aýmaǵynda kitap jármeńkesi uıymdastyrylyp, naýqanǵa belsene qatysyp, óz tańdaýyn jasaýǵa kelgen qala turǵyndaryna túrli janrdaǵy kitaptardy satyp alýǵa múmkindik jasaldy.
Al Kentaý qalasynda kókparshylar jınalyp, birge daýys berýdi jón sanapty. Saptama etik kıip, tobylǵy qamshy ustaǵan olar óz tańdaýyn jasady.
Jalpy, Túrkistan oblysynda 1 mln 180 myńnan asa daýys berýshi bar. Ortalyq referendým komıssııasynan 13 respýblıkalyq qoǵamdyq birlestik, oblystyq aýmaqtyq referendým komıssııasynan 32 qoǵamdyq birlestik akkredıtasııadan ótken. Barlyq 945 referendým ýchaskesinde 6 433 baıqaýshy men 20 mobıldi kapıtan, sondaı-aq 167 aýyldyq eldi mekende turǵyndardy tekserý úshin jyljymaly medısınalyq pýnktter jumys istedi. Daýys berýge alǵashqy kelgenderge arnaıy syılyqtar tabys etildi. Oblys boıynsha qoǵamdyq kólikter tegin qatynady. Kólik demekshi, barlyq aýdandarda «ınvataksı», áleýmettik taksıler qyzmet kórsetti. Mysaly, Maqtaaral aýdanynda múgedektigi bar azamattarǵa jaǵdaı jasaý úshin 61 saılaý ýchaskeleri arnaıy kabınalar, taktıldik kórsetkishtermen, monıtorly kompıýter, ulǵaıtqyshtar, tutqalarmen jáne pandýstarmen tolyq jabdyqtalǵan. Sonymen qatar 11 sýrdo-tıflo aýdarmashy, 3 «ınvataksı», 4 áleýmettik taksılerimen qamtamasyz etildi.
Túrkistan oblysy
