Foto: IIM
«Aqparattyq tehnologııalar men onlaın-qyzmetterdiń damýymen ınternette aqparat qoljetimdi. Bul ınternettegi alaıaqtyqtyń órship ketýine sebep boldy. Sońǵy jyldary bul jıi jasalatyn qylmys túrine aınaldy», dedi IIM krımınaldyq polısııa departamentiniń bastyǵy Qanat Nurmaǵambetov.
Mysaly, Qostanaı turǵyny DarkNet pen Telegram arqyly ınternet-alaıaqtyq jasaǵan. Qaskóı 1,5 mln teńgeden astam aqsha jymqyrǵany anyqtaldy. Er adam «kardıngpen», ıaǵnı bank kartalarynyń derektemelerin urlap jáne olardy qaıta satýmen, sondaı-aq aqshaǵa kompıýterlik vırýstardy taratýdy úıretýmen aınalysqan. Qazir fıgýrant ustalyp, sottaldy.
«Shymkenttik alaıaq Instagram paraqshanyń dýblıkatyn jasap, balalardyń emine aqsha jınaý arqyly adamdardy aldaǵan. Osylaısha ol 32 mln teńge jınaǵan. Alaıaq ustaldy. Qamaýda otyr», dedi Qanat Nurmaǵambetov.
Vedomstvo kıberqylmystarǵa qarsy kúresti júıeli túrde júrgizedi.
Sáýir aıynda Ýkraınanyń Odessa jáne Zaporoje qalalarynda ótken halyqaralyq arnaıy operasııa barysynda bes alaıaqtyq call-ortalyq joıyldy. Qaskúnemder Qazaqstan azamattaryna qatysty qylmys jasaǵan. 30-dan astam kúdikti ustaldy, qajetti is-sharalar júrgizilip jatyr.
Qyrkúıek aıynda jedel is-sharalardy ótkizý kezinde Almaty qalasynda tórt call-ortalyq joıylyp, 47 sheteldik ustaldy. Olar shet memleketterdiń azamattaryna qatysty alaıaqtyqpen aınalysqan. Tergeý sharalary júrgizilip, tárkilengen tehnıka tekserilip jatyr.
