Foto: seykhuninfo.kz
Mınıstrlik bıyl vegetasııa kezinde Aral teńizine 977 mln tekshe metr sý jiberdi. Bul josparlanǵan kólemniń 98%-y. Aıta ketý kerek, sońǵy birneshe jylda sýarý maýsymynda teńizge 350-400 mln tekshe metrdiń aınalasynda ǵana sý jiberilip kelgen bolatyn.
Al, jyl basynan beri Aralǵa 2 mlrd tekshe metrden astam sý tústi. Vedomstvo jyl sońyna deıin taǵy 500 mln tekshe metr sý jiberýdi josparlap otyr.
«Memleketaralyq sý sharýashylyǵy úılestirý komıssııasynyń 86-shy otyrysynda sala mınıstri Nurjan Nurjigitov sýarý maýsymy kezinde Aralǵa 997 mln tekshe metr sý jiberý jóninde kelisimge kelgen bolatyn. Nátıjesinde, Soltústik Aral teńiziniń sý kólemi 22 mlrd tekshe metrge jetti. Teńizge osyǵan deıin vegetasııa kezinde sekýndyna 7-10 tekshe metr sý jiberilgen bolsa, bıyl sekýndyna 60-70 tekshe metr sý jiberildi. Kórsetkish 10 ese artyq», dedi Aral-Syrdarııa basseındik ınspeksııasy basshysynyń orynbasary Zeınýlla Qaztoǵanov.
Araldan bólek, bıyl alǵash ret sýarý kezeńinde teńiz mańyndaǵy Aqshataý-Sorǵaq jáne Qamystybas kólder júıesine 45 mln tekshe metrden astam sý jiberilgen. Bul balyq sharýashylyǵy men týrızimdi damytýǵa tıimdi áser etip otyr.
Máselen, sońǵy jyldary Aral teńiziniń mıneralızasııasynyń azaıýy – balyqtyń kóbeıýine jaǵymdy áser etti. Teńiz tartylǵannan beri jergilikti balyqshylar jylyna 400 tonna ǵana balyq aýlasa, qazir 7,5-8 myń tonnaǵa deıin balyq aýlaıdy eken.
«Sý kelgeli balyq ta jandanyp, darııaǵa kirip jatyr. Bıyl byltyrǵyǵa qaraǵanda balyq kóbirek. Araldy osy deńgeıde ustap tursa da balyq sharýashylyǵy damıdy», deıdi Qaratereń aýylynyń turǵyny, balyqshy Kúntýǵan Turǵanbaev.
Aıta ketsek, Sý resýrstary jáne ırrıgasııa mınıstrligi Dúnıejúzilik bankpen birlesip Soltústik Aral teńizin saqtaý jónindegi jobanyń ekinshi kezeńine daıyndalyp, qujattama ázirlenip jatyr. Ekinshi kezeń Soltústik Araldy turaqty sýmen qamtamasyz etýden bastap ekonomıkalyq jáne áleýmettik jobalardy damytýǵa deıingi túrli baǵyttardy qamtıdy.
