Foto: Maqsut Narikbayev University
Bolat Sembın Jambyl oblysy, Baıqadam aýylynda dúnıege kelgen. 1969 jyly S.M. Kırov atyndaǵy QazMÝ-diń Zań fakýltetin támamdaǵan.
Ol eńbek jolyn prokýratýra organdarynda bastaǵan. Sonyń ishinde Qazaqstan Respýblıkasynyń Bas Prokýrorynyń orynbasary sııaqty joǵary laýazymdardy da atqarǵan.
2000 jyldan bastap B.Sembın Maqsut Narikbayev University-de prokýrorlyq qadaǵalaý jáne qylmystyq sot tóreligi boıynsha dárister oqyp, tájirıbesi men bilimin stýdenttermen bólisti.
Sondaı-aq, ol Maqsut Narikbayev University Dırektorlar keńesine tóraǵalyq etýmen qatar, ǵylymı jáne pedagogıkalyq qyzmetin de joǵary deńgeıde úılestire bilgen. B.Sembın «Qazaqstan Respýblıkasyndaǵy prokýratýra týraly», «Qazaqstan Respýblıkasynyń sottary jáne sýdıalardyń mártebesi týraly» zańdardy ázirleýge belsene atsalysqan.
«Memleket aldyndaǵy sińirgen eńbegi úshin Bolat Ajaqaıuly «Qurmet» jáne «Qurmet Belgisi» ordenderimen, «Qazaqstan Respýblıkasy Prokýratýrasynyń Qurmetti qyzmetkeri» tósbelgisimen, «3-shi synypty memlekettik ádilet keńesshisi» ataǵymen, Bilim jáne ǵylym mınıstrliginiń «Qazaqstan Respýblıkasynyń joǵary biliminiń qurmetti qyzmetkeri» tósbelgisimen marapattaldy. Sondaı-aq, «10 jyl Astana» jáne «Qazaqstan Respýblıkasynyń Táýelsizdigine 30 jyl» mereıtoılyq medaldarymen, Ǵylym jáne bilim mınıstrliginiń ǵylymdy damytýdaǵy eńbegi úshin tós belgisin ıelengen. Týysqandary men jaqyndarynyń qaıǵysyna ortaqpyz», delingen Maqsut Narikbayev University-ti taratqan habarlamada.
