Qazaqstan – Armenııa baılanysynyń jańa kezeńi

Yqpaldastyqty nyǵaıtatyn qadam

Memleket basshysy Armenııa Pre­zıdentine iltıpat kórsetip, elimizdiń qazaq-armıan yntymaqtastyǵyn múldem jańa deńgeıge kóterýge múddeli ekenin aıtty.

– Búgingi ýaǵdalastyqtar ózara baılanystyń nyǵaıa túsýine yqpal etedi dep senemin. Biz qazaq-armıan seriktestiginiń negizi sanalatyn joǵary deńgeıdegi kezdesýlerimizge erekshe mán beremiz. Qazaqstan Armenııamen dostyq qarym-qatynasty joǵary baǵalaıdy. Qazaq eliniń armıan halqyna yqylasy erekshe. Armenııa – elimizdiń senimdi ári ýaqyt synynan ótken jaqyn seriktesi. Bizdiń halyqtardy berik dostyq, ortaq tarıh jáne uqsas mádenı-gýmanıtarlyq qundylyqtar baılanystyrady. Ekijaqty qatynastar barlyq salada qarqyndy damyp kele jatqanyn aıryqsha atap ótkim keledi, – dedi Qasym-Jomart Toqaev.

Memleket basshysy bıyl Qazaq­stan men Armenııa arasyndaǵy Dostyq pen yntymaqtastyq týraly shart­qa qol qoıylǵanyna 25 jyl tol­ǵany atalyp ótetinin, osy ýaqyt aralyǵynda aýqymdy ınstıtýsıo­naldyq baza qalyptasqanyn aıtty.

– Saýda-ekonomıkalyq yqpal­das­tyq­tan bólek, qos halyq arasyn­daǵy mádenı-gýmanıtarlyq baılanys­tar sony serpinmen damyp keledi. Byltyr Erevanda Armenııadaǵy Qazaq teatrynyń kúnderi ótti. Kelesi jyly Sizdiń elińizde Qazaqstan mádenıetiniń onkúndigin uıymdastyrý josparlanyp otyr. Búgin О́zińizben birge Armenııanyń Qazaqstandaǵy mádenıet kúnderiniń saltanatty ashylý rásimine qatysamyz, – dedi Qazaqstan Prezıdenti.

О́z kezeginde Vaagn Hachatýrıan Qasym-Jomart Toqaevqa qonaq­jaılylyq tanytqany úshin alǵys aıtyp, Qazaqstanmen ózara tıimdi yntymaqtastyqty odan ári damytýǵa beıildi ekenin jetkizdi.

– Qasıetti qazaq jerine kelgenime qýanyshtymyn. Qazaqstannyń damý jáne órkendeý qarqynyna tánti bol­dym. Eki el arasyndaǵy dostyq qa­rym-qatynastar uzaq jyldarǵa jal­­ǵasady dep senemin. О́ıtkeni onyń tarıhı tamyry tereńde jatyr. Qazaqstan – bizdiń senimdi ári dos­tas seriktesimiz. Buǵan qosa, eki el arasyn­daǵy ekonomıkalyq baılanys tabys­ty damyp kele jatqanyn atap ótkim keledi, – dedi Armenııa Prezıdenti.

Kelissóz barysynda taraptar saýda-ekonomıkalyq, kólik-logıstıka, aýyl sharýashylyǵy, qarjy, mádenı-gýmanıtarlyq jáne sıfrlandyrý salalaryndaǵy yqpaldastyqty nyǵaıtýdyń perspektıvalaryn talqylady. Sondaı-aq aımaqtyq jáne halyqaralyq kún tártibindegi ózekti máseleler qarastyryldy.

Qasym-Jomart Toqaev Qazaq­stan tarapy Ázerbaıjan men Armenııanyń beıbit kelisimge kelýi úshin Almaty alańyn aldaǵy ýaqytta da usynýǵa daıyn ekenin rastady.

Armenııanyń Qazaqstandaǵy mádenıet kúnderi bastaldy

Qasym-Jomart Toqaev pen Vaagn Hachatýrıan Armenııanyń Qazaqstandaǵy mádenıet kúnderiniń ashylý saltanatyna qatysty. Osynaý konsert Qalıbek Qýanyshbaev atyndaǵy Qazaq ulttyq mýzykalyq drama teatrynda ótti.

Prezıdentter, eń aldymen, dańqty armıan kınorejısseri jáne sýret­shisi Sergeı Paradjanovtyń 100 jyl­dyq mereıtoıyna arnalǵan teatr foıesin­degi fotokórmeni tamashalady.

Konsertte Armenııanyń Memle­kettik djaz orkestri men Inga Arshakıan, Gor Sýdjıan sekildi ónerpazdary álemge áıgili armıan kompozıtorlary Komıtastyń, Sharl Aznavýrdyń, Jorj Garvarenstiń jáne Arno Babadjanıannyń mýzy­kalyq shyǵarmalaryn oryndady.

Sonymen qatar keshe bastalǵan Astanadaǵy Armenııa kınosy­nyń kúnderi búgin de jalǵasady. Al Sos Sarkısıan atyndaǵy «Amazgaın» teatry kórermen nazaryna Da­nııl Harms shyǵarmasynyń jelisi­men qoıylǵan «Lıý-Bef» spektak­lin usynady.