Foto: Erlan OMAR
Memleket basshysy Qasym-Jomart Toqaev osydan eki jyl buryn Ulttyq quryltaıda sóılegen sózinde Respýblıka kúnine ulttyq mereke mártebesin qaıtarýdy usynyp, jyl saıyn Egemendik kúnin elimizdiń basty merekesi retinde atap ótýimiz kerek ekenin aıtty. Sodan keıin «Qazaqstan Respýblıkasyndaǵy merekeler týraly» zańǵa ózgerister engizilip, 25 qazan ulttyq mereke – Respýblıka kúni, 16 jeltoqsan memlekettik mereke – Táýelsizdik kúni bolyp bekitildi. Dóńgelek ústelge jınalǵan sarapshylar eń áýeli halyqqa uǵynyqty bolýy úshin ulttyq merekeniń memlekettik merekeden aıyrmashylyǵy týraly oıyn ortaǵa saldy.
Oralbaı Ábdikárimovtiń aıtýynsha, Respýblıka kúnin tıisti deńgeıde qaıtadan atap ótý týraly málimdeme – memlekettiń tarapynan ýaqytynda aıtylǵan sheshim.
«Bul mereke jastar sanasynda berik ornaýy tıis. Sol sebepti barlyq oqý oryndarynda bul merekeniń mańyzy men mártebesin kóterý kerek. Eń basty mereke retinde atalyp ótýi tıis», dedi ol.
Berik Bekjanov bolsa, 1990 jyly qabyldanǵan deklarasııaǵa sáıkes respýblıka kúniniń 25 qazanda merekelenýi zańdy sheshim ekenin jetkizdi. Al Saparbaı Jubaev bul merekeni Táýelsizdik kúnimen mazmundastyryp almas úshin, ony «Qazaqstan kúni» dep ataýdy usyndy.
Merekeniń halyqtyq deńgeıde toılanýy úshin onyń mán-maǵynasy sımvolıkalyq sıpatta tolyqtyrylýy kerek. Bul týraly Nurbek Matjanı oı tarqatty.
«Naýryzdy toılaǵanda kıiz úı tigiledi, ulttyq oıyndar oınatylady, naýryz kóje daıyndalady. Bul – merekeniń ǵasyrlar súzgisinen ótken, el sanasynda ábden qalyptasqan atrıbýttar. Al Respýblıka kúninde halyq bir-birine qandaı syılyq jasaý kerek? Mine, osy máseleni aldyńǵy orynǵa shyǵarý kerek», dedi ol.
Sonymen qatar sarapshylar Respýblıka kúnine erekshe mán beretin memleketterdiń ozyq tájirıbesin talqyǵa salyp, munyń el bolashaǵy – balalardyń da qýanyshty merekesi bolý kerektigin atap ótti.
