Mysaly, Ordabasy aýdanynyń «Sh.Ýálıhanov atyndaǵy mektep-gımnazııasynyń» aǵylshyn tili pániniń muǵalimi Abıbýlla Jakýdaev Memleket basshysynyń qolynan «Qazaqstannyń eńbek sińirgen ustazy» tósbelgisimen marapattaldy. Pedagogıka salasynda 40 jyldan astam eńbek etken ustazdyń oqýshylary halyqaralyq, respýblıkalyq bilim shyńyn baǵyndyryp, búginde Túrkistan oblysyn kópke tanytyp keledi. Al Túrkistanda ótken «Ustazyma myń alǵys!» saltanatty is-sharasynda oblystyq olımpıada jáne sport jarystarynyń jeńimpazdaryn daıyndaǵan 30 muǵalim marapattalyp, arnaıy syılyqtarǵa ıe boldy. Naqtyraq aıtsaq, 10 ustaz «Y.Altynsarın» tósbelgisimen, 20 pedagog «Qurmet gramotasyn» alyp, 200 myń teńge kóleminde aqshalaı syıaqymen yntalandyryldy.
Merekelik jıynda oblys ákimi Darhan Satybaldy bilim salasynda aıanbaı eńbek etken ustazdar qaýymyn kásibı merekesimen quttyqtap, marapattardy tabys etti. Sondaı-aq Darhan Amangeldiuly shákirti 42 eldiń oqý oryndarynan shaqyrtý alǵan «Túrkistan Bilim-ınnovasııa» lıseıi geografııa pániniń muǵalimi Arǵyn Bastamıge oblystyń atyn álemge tanytqan eren eńbegi úshin kólik kiltin tabys etti. Onyń shákirti Islam Ábdirahmanov qazir AQSh-ta oqyp jatyr. Budan bólek, oqýshylary respýblıkalyq olımpıadanyń jeńimpazdary bolǵan, ózi isker, belsendi, oblystyq, respýblıkalyq baıqaýlardyń júldegeri Tólebı aýdany, Qosan Mamytov atyndaǵy mektebiniń bıologııa pániniń muǵalimi, 6 balanyń anasy Nurılla Baımahanqyzyna noýtbýk tartý etildi.
Túrkistan oblysy
