Sýretterdi túsirgen – Qaırat QONYSPAEV
Kompanııa óz qyzmetin keńeıtý maqsatynda «Bereke Bank» arqyly aınalym qarajatyn tolyqtyrýǵa nesıe, «Damý óndiris» baǵdarlamasy aıasynda «Halyk Bank» arqyly qarjylandyrý alǵan. Syıaqy mólsherlemesin «Damý» qory sýbsıdııalap, memlekettik qoldaý kórsetken.
Kásiporyn menedjeri Juldyz Ábishovanyń aıtýynsha, «Novus Polymer» – naryqtyń osy segmentinde jumys isteı bastaǵan alǵashqy kompanııalardyń biri. «Galwin» saýda markasynyń profılderi Almaty qalasynda eýropalyq tehnologııalar negizinde «Krauss Maffei» óndiristik jelileri men «Greiner Extrusion Technology» ekstrýzııa salasyndaǵy álemge áıgili kompanııanyń matrısalarynda daıyndalady. Dozalaý júıesiniń barlyq jumysy avtomattandyrylǵan. Qoldanylatyn tehnologııalar men biregeı jabdyqtar qysqa merzim ishinde standartty, standartty emes mólsherdegi joǵary sapaly profılder, túster shyǵarýǵa múmkindik beredi.
«Biz tereze jaqtaýlaryna arnalǵan profılderdi 2006 jyldan bastap shyǵardyq. Qazir zaýytta 2 020 jumysshy bar. Bıyl «Damý» qorynyń demeýimen qosymsha jumys oryndary ashyldy. Qazir barlyq qalada bizdiń resmı ókildikterimiz bar. Ras, ishki naryqta da, syrtqy naryqta da básekelesterimiz kóp. Biraq bizdiń ónim ekologııalyq taza shıkizat quramymen erekshelenedi», deıdi Juldyz Ábishova.
Tamshy tútikteri men tamshylap sýarý júıeleriniń jahandyq óndirýshisi – «Metzer Group» kompanııasynyń enshiles uıymy – «Irrıgator Qazaqstan» JShS óz qyzmetin 2014 jyly bastady. О́nimder tamshylatyp sýarý salasynda qoldanylady. «Eýrazııalyq bank» arqyly kásiporyn kásipkerlikti damytýdyń 2021-2025 jyldarǵa arnalǵan ulttyq jobasy aıasynda qarjylandyrýǵa ıe boldy. Qor jyldyq 21,75% syıaqy mólsherlemesiniń 13,75%-yn sýbsıdııalap, qoldaý kórsetti Nesıe qarajaty Almaty qalasynyń ındýstrıaldy aımaǵyndaǵy tamshylatatyn tútik, polıetılen, tamshylatatyn qubyrlar shyǵaratyn qondyrǵylar ázirleıtin zaýytqa jumsaldy.
Kompanııa bas dırektory Murat Aqshalov memlekettik organdarmen jáne halyqaralyq uıymdarmen birlesip fermerlerge ylǵal únemdeý tehnologııalaryn durys qoldanýǵa úıretý maqsatynda bilim berý baǵdarlamalaryn júrgizgenin atap ótti.
«Búginde memleket bul máselede fermerlerdi belsendi qoldaıdy, ylǵal únemdeý tehnologııalaryn engizýge sýbsıdııalar beredi. Bul olardy keńinen paıdalanýǵa yntalandyrady. Aýyl sharýashylyǵynyń klımattyq ózgeristerge tózimdiligin arttyrý men ylǵal tapshylyǵy jaǵdaıynda sý resýrstaryn paıdalanýdy jaqsartýdy keshiktirýge bolmaıdy. Tamshylatyp sýarýdyń zamanaýı tehnologııalary sýarý kezinde sý ysyrabyn azaıtý maqsatynda qoldanylady. Mundaı júıeler ósimdikterge sý berýdi neǵurlym dál baqylaýǵa múmkindik beredi. Ásirese qurǵaqshylyq kezeńde erekshe mańyzdy», deıdi.
Jemis shárbattary men jemis-jıdek pıýresin óndiretin «SKbar» kompanııasynyń alǵashqy klıentteri meıramhanalar men dámhanalar boldy,. Elimizde shárbat tutyný mádenıeti ósip kele jatyr. Adamdar jańa dámderdi tatyp kórgisi keledi. Tıisinshe, oǵan kóp qarjy jumsaıdy.
Joba jetekshisi Zakır Muhamedovtiń aıtýynsha, glıýkozaly-frýktozaly shárbat aǵzaǵa jeńil sińedi. Qazir qaladaǵy dámhanalar men kafe-barlardyń birazy osy kásiporynnyń ónimine tapsyrys beredi eken.
«Kásiporynnyń óndiristik qýaty – jylyna 7 mln lıtr shárbat, 1,5 mln lıtr pıýre, 250 tonna muz. Dámder palıtrasy óte keń. Qazirge deıin 100 hosh ıis pen dámdi shyǵarý ıgerildi. Kompanııada 100-den asa qyzmetker jumys isteıdi. Shaǵyn kólemnen bastadyq. Qolda bar qarajatqa qaraýsyz qalǵan ǵımaratty óndiriske daıyndadyq. Jańa jeli satyp alǵannan keıin ónimdi jetkizý kezindegi avtomobıl tapshylyǵy problemasyna tap boldyq. «Damý» qory avtokólik satyp alý úshin nesıeniń paıyzdyq mólsherlemesin 19%-dan 8%-ǵa deıin sýbsıdııalaýǵa kómektesti. Bul bizge jumys oryndaryn ulǵaıtýǵa múmkindik berdi. Búginde kásiporynnyń qýattylyǵy 50%-ǵa jetti», deıdi Zakır Muhamedov.
ALMATY
