Ulttyq statıstıka bıýrosy dereginshe, 2023 jyly elge 6,1 tonna kosmetıka ónimi jetkizilgen. Naryqtyń bul segmentinde Qytaı, Ispanııa, Fransııadan kelgen ónimderdiń bási basym. Gúlshashtyń aıtýynsha, naryqtyń osy segmentindegi ónimniń sapasy joǵary, saqtaý merzimi shekteýli, quramy baqylaýǵa alynǵan. Quramy tutynýshylardyń jas ereksheligi men talǵamyna qaraı jetildirilip otyrady.
Alǵashqy jyldary Shymkenttegi kásiporyndardyń biriniń kishkentaı buryshyn jalǵa alyp, bıznesin bastaǵan. Shıkizat ımporttaıdy. Keıin daıyn ónimderdi qutyǵa quıatyn qosymsha júıe ashty. 2020-2021 jyldary sál saıabyrsyp qalǵan bızneske 2022 jyldan bastap qaıta qan júgirdi. Endi Almatydaǵy ındýstrııalyq aımaqtan keńse alyp, óndiristiń ekinshi jelisin iske qosýdy josparlap júr. Munda «AG cosmetics» kremderiniń qutysy daıyndalady.
Keıipkerimizdiń sózinshe, naryqtyń talǵamy brend ónimderge basymdyq berip tur. Áıgili kompanııalar jyl saıyn mıllıardtaǵan dollardy tek jarnamaǵa jumsaıdy. 1909 jyly jartyǵasyrlyq tarıhy bar «L’Oréal» sulýlyq salasynda zertteýler júrgizip, jańalyqtar ashty. 1909 jyly Ejen Shýeller negizin qalǵan shaǵyn kompanııa 125 jyl álemdegi eń iri kosmetıka ónimderin shyǵaratyn topqa aınaldy.
«Kosmetıka naryǵynda otandyq ónim óndirýshilerdiń úlesi az. Sebebi bir ónimdi aınalymǵa shyǵarý úshin kosmetıka medısınasynan bastap tehnologterine deıin tutas komanda jumys isteıdi. Olardyń biri ónimniń terige áserin zerttese, ekinshisi naryq kózin izdeıdi. Ǵasyrlyq tarıhy bar kosmetıkalyq ónimderdiń bastapqy quramy 100 paıyz ózgerse de áý bastaǵy ataýyn saqtap qalady. Sebebi álem taýardyń sapasyna emes, brend ataýyna nazar aýdarady», deıdi Gúlshash.
Aıtýynsha, jasóspirimder ǵana emes, orta, aǵa býyn arasynda onkologııalyq teri dertiniń asqynyp ketýine medısınalyq saraptamadan ótpegen dúnıeler áser etip jatyr.
«Bizge kosmetıkalyq saýattylyq deńgeıin kóteretin kez keldi. Ár ata-ana balalaryna sapaly ónimder qoldanýdy jas kúninen qalyptastyrý kerek. Quny arzan kremderdiń quramyna eshkim kepildik bere almaıdy», deıdi.
«Kosmetıka ındýstrııasyn damytý – adamgershilik qundylyqtardyń qalaı ózgergeniniń kórinisi. Qytaı ǵalamdary garmondardyń ornyn almastyrýǵa baǵyttalǵan sanǵasyrlyq terapııasyn medısına ǵylymy endi qoldana bastady. Qazirgi zamanǵy ǵylymı tásildi qalyptastyrǵannan keıin de, ǵalymdar kóne Mysyr men basqa da ejelgi órkenıetterden kelgen kosmetıka jasaý reseptilerine jıi júginedi. Aıta ketý kerek, qazirgi brend ónimderdiń túpnusqasy orta ǵasyrlardaǵy tájirıbelerden nár alyp jatyr. Bizdiń analarymyz denesin bıe sútimen árlendirgen. Qazir bet kútimine arnalǵan kremderdiń quramynda bıe súti elementteri bar», deıdi keıipkerimiz.
El ishinde botoks, plastıkalyq otanyń qurbanyna aınalǵan zamandastarymyz jaıly da az aıtylyp júrgen joq.
«Sán álemi ındýstrııasy ókili retinde tabıǵı sulýlyqty qalaımyn. Adamnyń jaratylysy tabıǵat tárizdi kóktem, jaz, kúz, qystan turady. Ár jastyń óz sulýlyǵy bar. Tipti besiktegi sábıge de kútim kerek. Bet kútimi – aǵzadaǵy ózgeristerdiń barometri. Ár ájim – adam aǵzasynyń barometri. Deni saýdyń jany saý dep beker aıtpaǵan. Qazir kosmetıkalyq medısına botoks pen plastıkalyq operasııaǵa emes, ádemi qartaıýǵa múmkindik beretin dárýmenderdiń kózin izdep jatyr», deıdi.
Onyń endigi armany – zamandastarymyzǵa qajetti opa-dalaptardy barynsha ońtaılandyrý. Adamdar kúndizgi ýaqytta barynsha jeńil, suıyq krem, al túngi ýaqytta maıly, aýyr jaǵylatyn kremge basymdyq beredi. Gúlshashtyń aıtýynsha, kremniń quramy onyń jeńil-aýyrlyǵyna emes, shıkizatyna baılanysty. Eger shıkizat quramyna kúndiz nemese túngi emes, jyldyń tórt mezgilinde de birdeı áser etetin qospa qosylsa, bul másele sheshiledi.
«Kosmetıka naryǵynyń nany – shıkizat. Qazir Japonııa nemese Ońtústik Koreıanyń kosmetıkalyq medısınasy osy máseleni zerttep, óndiriske qosty. Aınalymǵa shyqsa, ındýstrııaǵa serpilis ákeletini sózsiz. Biraq ázirge olar shıkizat quramyn ashýǵa daıyn emes. Japonııada taǵylymdamadan ótip, jańalyǵyn elge alyp kelgim keledi. Sulýlyq álemin plastıkalyq ota nemese botokske degen táýeldilikten qutqaryp, ádemi qartaıýǵa múmkindik beretin kremdermen tolyqtyrǵym keledi», deıdi Gúlshash.
«AG cosmetics» ónimderi syrttan kelgen arzan taýarlarmen baǵa jaǵynan básekege túse almaıdy. Biraq suranys bar.
«Qara bazarlarda satylmasa da elimizdegi, Qyrǵyzstandaǵy sán salondarynan tapsyrys alamyn. Sulýlyǵynyń qunyn biletinder tapsyryspen aldyrady. Naryqtaǵy ornymdy saqtap qalý úshin keı kezde baǵa jaǵynan sheginis jasaýǵa týra keledi. Táýelsizdik tarıhynda «AG cosmetics» ónimderi arqyly óz atymmen qalǵym keledi, áýletimizdiń bıznes tarıhynda bul baǵyt úzilip qalmasa eken deımin», deıdi Gúlshash Áýbákir.
ALMATY
