Bul bastama apatty jáne úsh aýysymdyq mektepter máselesin sheship, oqýshy oryndarynyń tapshylyǵyn joıady. Bıyl Túrkistan oblysynda jalpy syıymdylyǵy 17 800 oryn bolatyn 29 jaıly mekteptiń qurylysy júrgizilip otyr.
Jaıly mektepterdiń alǵashqysynyń ashylý saltanatyna oblys ákimi Darhan Satybaldy men bilim salasynyń ardagerleri qatysty. Jańa bilim uıasy qaladaǵy 2 mekteptegi júktemeni azaıtýǵa múmkindik beredi. Birinshi kezekte munda №28 mektep-lıseıiniń oqýshylary kóship keldi. Qazirgi tańda 66 pedagog aýysý tártibimen, 7 pedagog konkýrstyq tártippen qabyldanǵan. Oqýshy sanynyń tolyǵýyna qaraı ózge de ustazdar konkýrstyq rásimmen qabyldanatyn bolady. Arnaıy iriktelgen ustazdardan bólek, qarjy, sharýashylyq qyzmetkerleri jumysqa alynǵan.
Oblys ortalyǵynyń jańa qala aýmaǵynda salynǵan 4 qabatty bilim ordasyndaǵy fızıka, hımııa, bıologııa jáne robottehnıka kabınetteri zamanaýı jabdyqtarmen qamtylǵan. Bilim alýshylardyń jan-jaqty damýy úshin mektepte sport, sheberlik zaldary, zerthanalar men demalys aımaqtary uıymdastyrylǵan. Joǵary jyldamdyqtaǵy ınternetke qosylǵan. Bastaýysh pen joǵary synyp oqýshylary jekelegen bloktarda oqıdy. Balalardyń jas ereksheligine oraı bloktardyń árqaısysy oqý synyptarymen, sanıtarlyq toraptarmen, sport zaldarymen jáne jekeshelegen kishkene shkaftarmen qamtylǵan. Erekshe qajettiligi bar balalar úshin ınklıýzıvti kabınetter, pandýstar, jedel satylar, arnaıy beıimdelgen ájethanalar salynǵan. «Oblysta bilim salasyna erekshe kóńil bólinip keledi. Oqý-tárbıe jumystaryna qolaıly jaǵdaı jasaý maqsatynda oblys ákimdigi barlyq qajetti sharany qabyldap otyr. Sonyń ishinde bilim oshaqtarynyń aýmaǵy men ǵımarat ishinde oqýshylardyń qaýipsizdigin tolyqtaı qamtamasyz etý basty mindetter qatarynda. Mektepter beınebaqylaý, dabyl júıelerimen qamtylyp, polısııanyń jedel basqarý ortalyǵymen ıntegrasııalandy. Sizderdiń mektepterińiz jaı ǵana jańa ǵımarat emes. Bul – damý men oqý úshin tamasha jaǵdaı jasalǵan oryn. Elimizdiń bolashaǵy – bilimdi urpaqtyń qolynda. Olardyń oqýda ozat bolyp, qoǵamnyń barlyq salasynda bıik belesterdi baǵyndyrýyna tilektespin», dedi oblys ákimi mekteptiń ashylý saltanatynda.
Joǵaryda aıtyp ótkenimizdeı, Prezıdenttiń tapsyrmasymen júzege asyp jatqan «Jaıly mektep» ulttyq jobasy aıasynda oblysta 29 mektep salynady. Jalpy, «Jaıly mektep» ulttyq jobasy sheńberinde 2023-2025 jyldary jobalyq qýattylyǵy 49 myń oqýshy oryndyq 63 mekteptiń qurylysyn júrgizý josparlanǵan. Oblys ákiminiń orynbasary Beısenbaı Tájibaevtyń aıtýynsha, jaıly mektepten bólek oblystyq bıýdjetten jáne arnaıy qordyń qarjy kózderinen 20 mektep pen 1 mýzykalyq mektep boı kóterdi. Onyń tórteýi el ıgiligine tapsyrylǵan. Qalǵan mektepterdiń qurylysy júrip jatyr. Jalpy, bıyl 14 bilim nysanyn tapsyrý kózdelse, 7 mekteptiń qurylysy kelesi jyly aıaqtalady dep josparlanyp otyr. Túrli joba men qarjylandyrý kózderi esebinen eki jylda 50 bilim nysany paıdalanýǵa berilgende óńirdegi apatty jáne úsh aýysymdy mektepter máselesi tolyq sheshimin tabady.
Túrkistan oblysy
