AQTО́BE. 16 maýsym. Aqtóbede shyǵystyń qos shynarynyń biri, qan maıdanda erlermen birge erliktiń asqan úlgisin kórsetken Keńes Odaǵynyń Batyry Álııa Moldaǵulovanyń 90 jyldyq mereıtoıyna oraı is-shara ótti. Bul týraly egemen.kz tilshisi habarlady.
Aldymen oblys ortalyǵyndaǵy batyr qyzdyń memorıaldyq keshenine soǵys jáne eńbek ardagerleri, batyrdyń týystary, «Álııa gúli» dostaryn shaqyrady» VI halyqaralyq balalar shyǵarmashyldyǵy festıvaline qatysýshylar jáne aqtóbelikter gúl shoqtaryn qoıdy.
Saltanatty sharada sóz alǵan qala ákiminiń orynbasary Aıgúl Arynǵazıeva jınalǵandardy mereıtoımen quttyqtady. Álııanyń erligi halqynyń jadynda máńgi saqtalatynyn, ásirese, jastardy otansúıgishtikke tárbıeleıtinin jetkizdi.
Batyr qyzymyzdyń naǵashy inisi Sapar Moldaǵulov qurmet kórsetip jatqan halyqqa rızashylyǵyn bildirdi. Munyń ózi Álııa apaıynyń rýhy aldyndaǵy urpaq paryzy ekenin tilge tıek etti. Saltanatty sátti ««Álııa gúli» dostaryn shaqyrady» VI halyqaralyq balalar shyǵarmashylyǵy festıvaline qatysýshylar myń buralǵan bımen bederledi.
Mereıtoılyq shara Keńes Odaǵynyń Batyry Álııa Moldaǵulovanyń memorıaldyq mýzeıinde jalǵasyn tapty. Munda oblystyq mádenıet, muraǵattar jáne qujattama basqarmasynyń qoldaýymen «Máńgilik ǵumyr» atty kezdesý uıymdastyryldy. Onda atalǵan basqarmas basshysynyń orynbasary Qydyrǵalı Ermuhan sóz alyp, jınalǵandardy Álııa apamyzdyń 90 jyldyq mereıtoıymen quttyqtady. Bul úlken toıdyń basy ekenin, respýblıkalyq deńgeıdegi mereke 17-18 maýsymda Aqtóbe qalasynda jáne Álııa dúnıege kelgen Qobda topyraǵynda jalǵasatynyn aıtty. Áskerı ǵylymdar doktory Kım Serikbev qazaqtyń qaısar da batyr qyzy Álııanyń erligi arqyly tek aqtóbelikter ǵana emes, barsha qazaqstandyqtar maqtanatynyn málim etip, mýzeıge eskertkish syılyǵyn usyndy. Maıdanger Murabaı Kemer soǵysta júrip Álııa men Mánshúktiń, Málik Ǵabdýllınniń Keńes Odaǵynyń Batyry atanǵanyn estigendegi kóńil-kúılerin, munyń ózi qazaqtar úshin maqtanysh bolǵanyn, jaýyngerlerdiń rýyhyn kótergenin aıtty. Álııa men Mánshúktiń ómiri men erligi, olardy este qaldyrý baǵytyndaǵy kóptegen bastamalarǵa uıtqy bolǵan «Qos Shynar» qoǵamdyq birlestigi Aqtóbe qalalyq qaıyrymdylyq qorynyń tóraǵasy Ǵalymjan Baıderbes Álııa apamyz jaıynda mazmundy sóz sóıledi.
Aqyn Amantaı О́tegenov Álııa týraly aqyn-jazýshylardyń qazaq tilindegi shyǵarmalaryn orys tiline aýdarǵanyn aıta kelip, óziniń «Kazahı» degen óleńin oqydy.
Shara barysynda «Álııa gúli» halyqtyq bı ansambli, oblystyq fılarmonııa ártisteri óz ónerlerin kórsetip, gýmanıtarlyq kolledjdiń «Mergender» toby batyr qyzdyń erlik jolyn beıneleıtin kórinis qoıdy. Mýzeıde Álııa Moldaǵulovanyń týǵan jeri Qobda óńiriniń tylsym tabıǵatyn týyndylaryna arqaý etken Marat Ospanov atyndaǵy Batys Qazaqstan memlekettik medısına ýnıversıtetiniń dosenti, áýesqoı sýretshi A.Korvattyń sýret kórmesi uıymdastyryldy.
Satybaldy Sáýirbaı.
Derek, sýret: egemen.kz.
