Is-sharany Almaty qalasynyń Qoǵamdyq damý basqarmasy qoldap uıymdastyrdy. Basqarma basshysy Aıdar Esenbekov sóz sóılep, merekeniń mańyzdylyǵyna toqtala ketti. Sondaı-aq Almatyda Respýblıka kúni qalaı toılanatynyn baıandady.
Qatysýshylar eldegi aýqymdy reformalardy hronologııalyq retpen talqylap, tarıhqa sholý jasady. Jyl saıyn 25 qazanda elimizde Respýblıka kúni atap ótiledi, bul mereke 1990 jyly qabyldanǵan Memlekettik egemendik týraly deklarasııanyń mańyzyn aıshyqtaıdy. Deklarasııa 1991 jyly Qazaqstannyń tolyq táýelsizdikke jetýiniń alǵashqy qadamy boldy.
Qoǵam qaıratkeri, ekonomıka ǵylymdarynyń doktory Orazaly Sabden óz sózinde tarıhı qujattyń qabyldanǵan kezin eske alyp:
«Bul kúni Qazaq Respýblıkasynyń irgetasy qalandy. Joǵaryda jınalǵan depýtattar arasynda túrli pikirler bolǵanymen, biz halyqty qoldaýǵa shaqyrdyq. Deklarasııa qabyldanǵan kezde eldiń basqarý júıesi qurylyp, memlekettik rámizderimiz bekitildi. Depýtattar osy mańyzdy qujatty talqylap, barlyǵy alty saǵat boıy suraqtar qoıdy. Dál sol sátte kóptegen mańyzdy máseleler talqylandy, bul sátte kózimizge jas almaý múmkin emes edi», dep óz oıymen bólisti.
Sonymen qatar Orazaly Sabden Qazaqstandy odan ári damytý jónindegi usynystaryn da ortaǵa saldy. Ekonomıst retinde ol ǵylymı-tehnologııalyq damýǵa jáne kásipkerlikke nazar aýdarýdy usyndy:
– «Ádiletti Qazaqstan» tujyrymdamasyn iske asyrý úshin rýhanı jańǵyrý men joǵary tehnologııalardy engizý qajet. Ǵylymdy óndiriste qoldaný, shaǵyn jáne orta bıznesti qoldaý arqyly eldiń ál-aýqatyn arttyryp, orta tapty qalyptastyrý mańyzdy, – degen pikirin bildirdi.
Almatynyń Azamattyq alıansynyń tóraǵasy, professor Qaıyrjan Abdyhalyqov óz sózinde azamattyq qoǵamnyń rólin erekshe atap ótti:
«Táýelsizdik jyldary Qazaqstanda azamattyq qoǵam qalyptasyp, damydy. Ol halyq pen bılik arasyndaǵy baılanys retinde sheshim qabyldaý úderisine qatysyp, reformalardyń ilgerileýine yqpal etedi», dep túıindedi.
Professor, tarıh ǵylymdarynyń kandıdaty Mendyǵanym Shaımerdenova 1991 jyly Almatyda bolǵan tarıhı oqıǵany eske sala otyryp:
«21 jeltoqsanda Almatydaǵy Dostyq úıinde prezıdentter kezdesip, Táýelsiz Memleketter Dostastyǵy (TMD) týraly Almaty deklarasııasy qabyldandy. Respýblıka kúni tek saıası ǵana emes, mádenı-tarıhı turǵydan da mańyzdy mereke», dep atap ótti.
Almaty qalasynyń Qoǵamdyq keńes múshesi Beknur Kısıkov eldiń ekonomıkalyq damýyna toqtala kelip: «Qazaqstan egemendikke qol jetkizgennen keıin óz valıýtasyn engizip, ekonomıkalyq saıasatyn qalyptastyrdy. Biraq áli de tolyq ekonomıkalyq táýelsizdikke jetý úshin naqty sharalar qajet», degen usynys aıtty.
Konferensııa qatysýshylary óz oılaryn ortaǵa salyp, bolashaqtaǵy tabysty qadamdarǵa serpin aldy.
