Foto: Qamshy.kz
Týrnır «Kóshpelilerdiń Asyq sporty» halyqaralyq federasııasy, «Respýblıkalyq Asyq atý» federasııasy, QR Týrızm jáne sport mınıstrliginiń Sport jáne dene shynyqtyrý isteri komıteti jáne «Ulttyq jáne at sporty túrleri ortalyǵymen» birlesip uıymdastyrylyp jatyr.
Týrnır aıasynda elimizdiń ár aımaǵynda ótken irikteý kezeńderinde 21 jastan asqan 2 myńǵa jýyq adam ózara baq synasty. Ár óńirden úzdik shyqqan 2 sportshy elordada ótetin fınaldyq oıyndarǵa joldama aldy.
Sheshýshi oıyndar 25 qazan kúni Astanadaǵy «Qazaqstan» jeńil atletıkalyq sport kesheninde ótedi, onda týrnır jeńimpazyna avtokólik syıǵa beriledi.
«Kóshpelilerdiń Asyq sporty» halyqaralyq federasııasynyń prezıdenti, «Respublica» partııasynyń Májilistegi depýtaty Oljas Quspekov ulttyq oıyndy jańǵyrtý – ulttyq jáne rýhanı qundylyqtarymyzdy, mádenıetimizdi dáripteýge yqpal etýge jáne sportshylarǵa óz sheberlikterin shyńdaýǵa zor múmkindik ekenin atap ótti.
«Ulttyq oıyndarymyzdyń búginde qaıta óristep jandanýy qýanyshty jaǵdaı. Osyndaı jarystardy neǵurlym jıi uıymdastyrý arqyly ulttyq oıyndardy barynsha nasıhattaımyz. Sonymen qatar saıystar sportshylardyń sheberligin shyńdaıdy, olardyń jan-jaqty damýy úshin zor septigin tıgizedi dep esepteımin. Respublica partııasynyń saılaýaldy baǵdarlamasynda qazaqtyń tarıhı-mádenı muralaryn saqtaý jáne dáripteý, ulttyq qundylyqtardy urpaqqa jetkizý maqsat etilgen. Sol alǵan baǵytymyzdan taımaı, jumys jasaýdy jalǵastyra beremiz», dedi Oljas Haırollauly.
Aıta ketý kerek, «Kóshpelilerdiń Asyq sporty» halyqaralyq federasııasy qurylǵan jarty jyldyń ishinde 14 elde turaqty asyq oınaý federasııalary tirkeldi, asyq oınaý sporty kóshpeliler oıynynyń turaqty dıssıplınasy bolyp bekitildi. Endi, eki jylda bir ret álem chempıonaty ótkizilip turady. Alǵashqysy bıyl uıymdastyrylyp, oǵan 14 eldiń ókilderi qatysty.
