– Prezıdent óz Joldaýynda buqaralyq sportty damytýdyń mańyzdylyǵyn aıryqsha atap ótti. О́ńirde bul baǵyttaǵy jumys órkendi deýge bolady. Jyl saıyn sport nysandary sany kóbeıip keledi. Kent turǵyndary bul keshendi kóp kútti. Endi osy jerden týymyzdy bıikte jelbiretetin chempıondar shyǵa bersin! – dedi aımaq basshysy.
Keshende barlyq ınjenerlik ınfraqurylym eskerilgen. Sportpen shuǵyldanýǵa qajetti sport jabdyqtarynyń bári bar. Munda jattyǵýdan bólek, sheberlik sabaqtary men jarystar ótedi. Aldaǵy ýaqytta túrli seksııalar ashý josparlanyp otyr. Endi aýyl jastary fýtbol, voleıbol, basketbol, kúres, ústel tennısi syndy sporttyq oıyndarmen emin-erkin aınalysa alady.
– Kentte 10 myńnan asa adam turady. Onyń 30 paıyzdan astamy sportpen belsendi túrde shuǵyldanady. Sport kesheni tolyq jabdyqtalǵan. Medısınalyq pýnkt, sportshylardyń demalys bólmesi, túrli sport zaldar, ádiskerler kabıneti bar. 18 jasqa deıingi sportshylar men múmkindigi shekteýli jandarǵa sport seksııalary tegin. Al stýdentterge 50 paıyz jeńildik qarastyrylǵan, – dedi sport ǵımaratynyń meńgerýshisi Ǵalııa Málikqyzy.
Topar kenti álemdik arenalarda nátıjeli óner kórsetken sportshylarymen jaqsy tanymal. Paralımpıadalyq júzýshi Andreı Afanasev, aýyr atlet Danııar Seısenov, paýerlıfter Qaırat Isjanov, polıatlonshy Ámirlan Imashev sekildi baıraqty básekelerde top jaryp júrgen sport sańlaqtary bar. Jańa sport kesheninde jattyǵatyn jas urpaqtyń kúni erteń sport juldyzy atanyp, jarq etip shyǵatynyna negiz de, senim de, úmit te mol.
Jalpy, Abaı aýdanynda buqaralyq sport qarqyndy damyp keledi. Búgingi kúni 113 sport nysany jumys isteıdi. Jyl sońyna deıin aýdanda bokstan eki iri respýblıkalyq týrnır ótkizý josparlanǵan.
Qaraǵandy oblysy,
Abaı aýdany,
Topar kenti
