«Bul jyl bizge aıryqsha mańyzdy boldy. Bıylǵy jyldyń alǵashqy toǵyz aıynda oblysqa 615 mıllıard teńge ınvestısııa tartylyp, ótken jylmen salystyrǵanda 32,8 paıyzǵa ósti. О́nerkásip óndirisiniń kólemi 1,4 trıllıon teńgege jetse, aýyl sharýashylyǵy ónimderi 480,6 mıllıard teńgege jetip, 1,9 paıyzǵa ósti. Sonymen qatar jalpy kólemi 777,1 myń sharshy metr jańa turǵyn úı paıdalanýǵa berildi, qurylys jumystarynyń quny 243,8 mıllıard teńgege teń boldy. Jyl basynan beri 45 myńnan astam jańa jumys orny ashyldy, bul – turǵyndardyń ál-aýqatyn arttyrýdyń mańyzdy kórsetkishi. Biz durys baǵytta kele jatyrmyz, birlese otyryp budan da úlken jetistikterge qol jetkizemiz», – dedi Almaty oblysynyń ákimi Marat Sultanǵazıev.
Saltanatty is-sharada oblystyń damýyna úles qosqan 30-dan astam azamat memlekettik nagradalarmen marapattaldy. Olardyń qatarynda túrli sala ókilderi bar.
Mereke aıasynda ashylǵan nysandar óńir turǵyndarynyń ómir sapasyn arttyrýǵa baǵyttalǵan. Atap aıtar bolsaq, Eńbekshiqazaq aýdany Ashysaı aýylynda kópten kútken 150 oryndyq zamanaýı sport kesheniniń ashylý saltanaty ótti. Bul oqıǵa – jergilikti ınfraqurylymdy damytýdaǵy eleýli qadam, aýyl turǵyndarynyń sportpen shuǵyldanýyna, densaýlyǵyn nyǵaıtýǵa jańa múmkindik ashady.
«Memleket basshysy Qasym-Jomart Toqaev «Sportpen shuǵyldaný kerek. Ásirese jastarymyzdyń deni saý, myqty azamat bolyp ósýi qajet. Sebebi Qazaqstannyń bolashaǵy – jastardyń qolynda. Jastardyń deni saý bolsa, memleket te qýatty bolady», – dep atap ótti. Bizdiń mindetimiz – óskeleń urpaqtyń, ásirese aýyl jastarynyń boıyndaǵy kúsh-qýatyn durys baǵyttaý, sportpen shuǵyldanýǵa tıisti jaǵdaı jasaý. Jańa sport kesheninde halqymyzdy álemge tanytar ataqty chempıondar shyǵýyna tilektespin. Bul ǵımarat sanaly urpaq tárbıelep, salamatty ult qalyptastyratyn ortalyqqa aınalatyny sózsiz. Táýelsiz elimizdiń kók týyn bıikte ustar ulandarymyz kóp bolsyn», – dedi is-sharaǵa qatysqan Almaty oblysy ákiminiń orynbasary Nurjan Qudaıbergenov.
Sport kesheni Almaty oblysy qurylys basqarmasynyń tapsyrysymen salyndy, al bas merdiger – «SMÝ Shyǵys» JShS. Keshenniń qurylysy byltyrǵy jyly bastalyp, bir jarym jyl ishinde sporttyq sharalardy uıymdastyrýǵa qoıylatyn barlyq talapqa saı zamanaýı nysanǵa aınaldy. Sport kesheniniń jalpy aýdany 1538,6 sharshy metr, onyń ishinde boks, kúres, voleıbol, basketbol, fýtbol, gandbol zaldary bar. Qurylystyń jalpy quny – 907, 2 mln teńge.
Respýblıka kúni merekesi qarsańynda Balqash aýdanynyń Aqdala aýyldyq okrýginde kúnine 30 adam qabyldaıtyn feldsherlik-akýsherlik pýnkttiń ashylý saltanaty ótti. FAP qurylysy «Aýyldyq densaýlyq saqtaýdy jańǵyrtý» ulttyq jobasynyń sheńberinde júzege asty. Jer telimi – 0,3000 ga. Smetalyq quny 210 239,49 myń teńgeni quraıdy. Merdiger – «GradStroıServıs» JShS.
Is-sharaǵa qatysqan Balqash aýdanynyń ákimi Azat Qutpanbetov turǵyndardy mereıli merekemen quttyqtap, jańa ǵımarat el ıgiligine qyzmet etsin dep tiledi.
Halyq tyǵyz shoǵyrlanǵan Qarasaı aýdany, Qaskeleń qalasyndaǵy «Qarlyǵash» turǵyn úı kesheninde áleýmettik osal toptar sanaty boıynsha satyp alý quqyǵynsyz jyl basynan beri 30 úıdiń kilti tabys etilgen bolsa, mereke qarsańynda olardyń qatary baspanaǵa muqtaj 10 otbasymen tolyqty. Jańa páterdiń kiltin alǵan otbasy músheleri ulan-asyr qýanyshqa keneldi.
Megapolıspen irgeles Ile, Talǵar aýdandarynda, Alataý qalasynda blokti-modýldik qazandyqtar (BMQ) iske qosylyp, kópqabatty turǵyn úı ıeleriniń kópten kútken qýanyshyn eseledi. Jańa zamanaýı tehnologııalarmen jabdyqtalǵan qazandyqtar ekologııalyq taza ári ekonomıkalyq jaǵynan tıimdi jylý alýdy qamtamasyz etedi. Turǵyndardyń úılerinde jylýdyń jaılylyǵy men qaýipsizdigi ornaıdy, bul ásirese aıazdy kúnderde mańyzdy. Jańa qazandyqtardyń iske qosylýy, turǵyndardyń turmys-tirshiligin jaqsartýǵa baǵyttalǵan. Aldaǵy ýaqytta avtomattandyrylǵan júıeler men zamanaýı tehnologııalar qyzmet kórsetý merzimin uzartýǵa, jóndeý jumystaryn ońtaılandyrýǵa múmkindik beredi.
Sonyń biri Ile aýdany Boraldaı kentindegi «Almat» qazandyǵy jańa kezeńniń bastaýy boldy. Mereke qarsańynda qazandyqtyń barlyq qurylys jumystary aıaqtalyp, jelilerdi synaý, iske qosý-jóndeý úderisteri sátti júzege asyryldy. Synaq kezinde qazandyqtyń qýattylyǵy, jylý bólý tıimdiligi men qaýipsizdigi tekserildi. Nátıjesinde, barlyǵy josparǵa saı oryndalyp, turǵyndarǵa senimdilik syılady.
Mereke kúni Keńdala aýylynda quny 234,5 mıllıon teńge bolatyn BMQ iske qosyldy, ol búginde qalypty jumys istep tur. Al Alataý qalasyndaǵy «Ofıserler úıi» qazandyǵy 13 kópqabatty turǵyn úıdi jylýmen qamtamasyz etip otyr.
Qazirgi tańda Talǵar aýdany Alataý aýyldyq okrýgine qarasty Altyndán aýylyndaǵy kóppáterli turǵyn úılerdi jylýmen qamtamasyz etý maqsatynda gazben jumys isteıtin BMQ qurylysy jalǵasyp jatyr. Munda qurylys-montaj jumystary 90 paıyzǵa oryndalyp, jobanyń jalpy quny 106,6 mıllıon teńgeni quraıdy. Joba qarasha aıynyń basynda aıaqtalady dep josparlanyp otyr.
Bul bastamalar turǵyndardy jylýmen qamtamasyz etip qana qoımaı, óńirdiń ekonomıkalyq damýyna, jańa jumys oryndarynyń ashylýyna, ómir súrý sapasynyń artýyna yqpal etedi. Oblys turǵyndary aldaǵy qys aılarynda jylýmen qalypty túrde qamtamasyz etiletin bolady.
Almaty oblysy
