Árıne, oraq endi bastalǵan tamyzdyń ekinshi jartysynan beri úzilmeı turyp alǵan nóser saldarynan astyq jınalmas degen qaýip bolǵany ras. Talaı dıqandardyń qabaǵy túıilip, sóılesýge de zaýqy soqpaı qalǵan edi. Tipti bıdaı sabaǵynan órip kete me degen de qaýipti joramal da jasaldy. Áıteýir qyrkúıektiń basynan turǵan ashyq kúnder astyqty jınap alýǵa múmkindik berdi-aý.
Oblystyq Aýyl sharýashylyǵy basqarmasynyń málimeti boıynsha, bıdaıdyń oblystaǵy ortasha bereke gektaryna 18 sentnerden aınalǵan. Al uqypty sharýalar keıbir egis alqabynan 40-50 sentnerden astyq jınady. Sonyń ishinde gektarynan 31 sentnerden astyq alǵan Tımırıazev aýdanyndaǵy «Baiterek SK» JShS, gektarynan 39,2 sentnerden jınaǵan Aqqaıyń aýdanyndaǵy «Sımargl» JShS, gektar berekesin 40 sentnerden aınaldyrǵan Mamlıýt aýdanyndaǵy «Rýslan» sharýa qojalyǵy bar. Al Aıyrtaý aýdanyndaǵy Baıtas Qazybekov basqaratyn «Shangal» JShS astyqty gektarynan 50 sentnerden jınady.
Bular – mıneraldy tyńaıtqyshtardy óz ýaqytynda jetkizip, aramshópterdi ýaqytynda joıyp, óskindi kóziniń qarashyǵyndaı qorǵap otyrǵan, ozyq tehnıkalarmen jumys istegen sharýaqor dıqandar. Olar bıyl egis alqaptaryna 257 myń tonna mıneraldy tyńaıtqysh jetkizdi. Al jerdi tyńaıtýdy oılamaıtyn, oǵan mal tússe qorǵaıtyn kúzetshige de shyǵyn shyǵarǵysy kelmeıtin, aramshóbi óskindi basyp ketse de, ony hımııalyq arnaýly suıyqtyqtarmen joıýdy bilmegen, tek jerdi soryp, alýdy ǵana bilgen sharýalardyń astyǵy jutań boldy.
Sýretti túsirgen – Erlan OMAR, «EQ»
Oblystyq Aýyl sharýashylyǵy basqarmasy basshysynyń orynbasary Jalǵas Súleımenovtiń aıtýyna qaraǵanda, búginde oblystyń barlyq elevatoryna 1,6 mln tonna astyq jetkizilipti. Sonyń 1,2 mln tonnasy – bıdaı. Oblys aýmaǵynda 3,2 mln tonna astyq saqtaıtyn 46 elevator bar. Sonymen birge agroqurylymdarda ózderiniń 3,7 mln tonna astyq saqtaıtyn qoımalary bar. Ulttyq statıstıka basqarmasy oraq bastalmaı turǵanda oblystyń astyq qoımalarynda 1,4 mln tonnaǵa jýyq byltyrǵy astyq jatqanyn jarııalaǵan. Endi ushy-qıyrsyz jańa astyq quıylsa, saqtaıtyn oryndar tarlyq etedi.
J.Súleımenov ázirge túsken astyqtyń 41 paıyzy úshinshi klastyq, 47 paıyzy tórtinshi klastyq surypqa jatatynyn aıtty. «Bul – oraq naýqany kezinde aýa raıynyń jaýyn-shashyndy bolǵany sebepti astyqtyń boıyndaǵy ylǵaldyń moldyǵynan. Qazir elevatorlar men qoımalarǵa astyqty qurǵatý jumystaryna paıdalaný úshin jeńildetilgen baǵamen 20 myń tonna dızeldi otyn, 5 myń tonna suıytylǵan gaz bosattyq. Oblysta bir táýlikte 255 myń tonna astyqty qurǵata alatyn barlyǵy 332 qurǵatqysh tehnıka bar. Olar qazir táýlik boıy jumys istep jatyr», dedi ol.
Basqarma ókili qazirdiń ózinde 2025 jylǵy egiske 470 myń tonna tuqym quıylǵanyn jetkizdi. Bul – oblys sharýalaryna tolyq jetedi degen sóz. Alǵashqy bozqyraý ótse de jınala beretin keıbir maıly daqyldardy orý áli jalǵasyp jatyr. Ázirge onyń jınalǵan kólemi 15 paıyzǵa da jetpeıdi. Jınalǵan zyǵyr, raps, kúnbaǵys kólemi 600 myń tonnaǵa jetken. Bıyl 7,4 myń kartop, 100 gektardaı jerge qyzylsha, 251 gektar jerge sábiz egilip, qazir olar da tolyq jınalǵan.
Al mal azyǵy úshin oblys bıyl 415 myń tonna pishendeme, 509 myń tonna súrlem, 1 mln 244 myń tonna shóp úıip aldy. Bul – aldaǵy jylǵa erkin jetip, tipti artylyp qalýǵa tıisti kólem.
Soltústik Qazaqstan oblysy
