Foto: egemen.kz| Erlan Omar
Tıisti zańdar elimizdiń áleýmettik-ekonomıkalyq damý boljamyn, Memleket basshysynyń tapsyrmalaryn negizge ala otyryp ázirlengen.
2025 jyly kiris 15,6 trln, 2026 jyly – 16,7 trln, 2027 jyly – 18,2 trln teńge bolady dep boljanyp jatyr. Shyǵyndar sáıkesinshe 25,8 trln, 23,2 trln jáne 24,6 trln teńge bolmaq. Bul rette Ulttyq qordan kepildendirilgen transfertterdiń kólemi jylyna 2 trıllıon teńgeni quraıdy.
Respýblıkalyq bıýdjet shyǵystarynyń 68 paıyzdan astamy Qazaqstan Respýblıkasynyń 2029 jylǵa deıingi Ulttyq damý josparynda, ulttyq jobalarda, tujyrymdamalarda, damý josparlarynda jáne basqa da qujattarda belgilengen strategııalyq maqsattary men nysanaly ındıkatorlaryn iske asyrýǵa baǵyttalǵan.
Zań jobalary jónindegi jumys toptarynyń jetekshisi Erkin Ábil qosymsha baıandamasynda bıýdjet jobasynda tutastaı alǵanda ekonomıkanyń turaqty ósýi (orta eseppen jylyna 5,4%-ǵa) boljanǵanyn atap ótti. Onyń ishinde, óńdeý ónerkásibi (5,8%), qurylys (9,3%), aqparat jáne baılanys (9,5%) ósý qarqyny syndy jekelegen salalar bar.
Bıýdjet jobasy memlekettiń barlyq áleýmettik mindettemesiniń oryndalýyn, sonyń ishinde memlekettik qyzmetshilerdiń jalaqysyn, zeınetaqy men stıpendııany kezeń-kezeńimen arttyrýdy qamtamasyz etedi.
