Sýret: El.kz/Mırajan Mahan
Konsýldyqtyń basty maqsaty – eki eldiń memlekettik qurylymdary men bıznes salasyndaǵy ózara baılanysty arttyryp, ınvestısııa jáne saýda qatynastaryn damytý. Atap aıtsaq, bul ekijaqty ekonomıkalyq, mádenı qatynasqa baǵyttalǵan, sondaı-aq elimizdegi Sıngapýr azamattarynyń múddesin qorǵaıdy. Qazir el aýmaǵynda 100-den asa sıngapýrlyq kompanııa jumys isteıdi. Konsýldyq olardyń quqyqtaryn qorǵap, keńes beredi.
Sonymen qatar Sıngapýr Respýblıkasynyń Qazaqstandaǵy elshisi Zýlkıflı Baharýdın Astana men Almatyda ashylǵan konsýldyq dostyq pen áriptestikke negizdelgen qarym-qatynasty nyǵaıta túsedi dep senim bildirdi.
– Sıngapýr men Qazaqstan 30 jyldan asa ýaqyt ózara tıimdi iskerlik baılanys júrgizip keledi. Biz týrızm, bıznes, logıstıka, aýyl sharýashylyǵy, qurylys jáne mádenıet salasynda birikken jobalardy birigip iske asyrýǵa múddelimiz. Qazir Qazaqstan – Ortalyq Azııadaǵy eń iri saýda áriptesimiz. Tabıǵı resýrstarǵa baı jáne Ortalyq Azııaǵa jol ashar el retinde Qazaqstan Sıngapýrǵa mol múmkindik usynyp otyr, – dedi Elshi konsýldyqtyń saltanatty ashylý rásiminde.
Eki eldiń Syrtqy ister mınıstrlikteriniń kelisimimen elimizdiń eki qalasyndaǵy Sıngapýrdyń qurmetti konsýly qyzmetine Talǵat Chınıkeev taǵaıyndaldy. Ol halyqaralyq bıznes pen yntymaqtastyq salasyndaǵy mol tájirıbesimen erekshelenedi.
– Eń aldymen eki el arasyndaǵy berik dostyq pen ósip kele jatqan seriktestikti nazarǵa ala otyryp, Sıngapýrdyń atynan ókildik etýdi, onyń elimizdegi ekonomıkalyq jáne mádenı múddelerin ilgeriletýdi maqtan tutamyn. «Alǵa Sıngapýr» jáne «Ádil Qazaqstan» tujyrymdamasynyń qoǵamdy berik jáne yntymaqta ustaý, sondaı-aq damýdyń jetistikterimen bólisý sııaqty strategııalyq nusqaýlar men jalpyulttyq qundylyqtar retinde kóptegen uqsastyqtary bar. Qazir «Qazaqstan temir jolymen» Sıngapýrdyń iri kompanııasy birigip, aýqymdy jobany júzege asyryp jatyr. Almaty oblysynda «Alataý sıtı» degen qala salynbaqshy. Almatydan Qonaev qalasyna deıin 900 sharshy metr aýmaqta boı kóteretin úlken qalanyń bas josparyn Sıngapýrdyń kompanııasy jasap berdi, – dedi Sıngapýrdyń Qazaqstandaǵy qurmetti konsýly Talǵat Chınıkeev.
