«Eýrazııa» – Qazaqstandaǵy eń iri kınoforým jáne halyqaralyq kınoprodıýserler qaýymdastyqtary Federasııasy (FIAPF) akkredıttegen Ortalyq Azııadaǵy birden-bir kınofestıval. Festıvaldiń turaqty quryltaıshysy ári uıymdastyrýshysy QR Mádenıet jáne aqparat mınıstrligi.
Kınofestıvaldi uıymdastyrý Sháken Aımanov atyndaǵy «Qazaqfılm» ulttyq kınostýdııasyna tapsyryldy. Munyń ózindik sebebi de bar. Osy jyly kınostýdııa birneshe mańyzdy mereıtoıdy atap ótýde. Birinshiden, kınostýdııanyń 90 jyldyǵy. Ekinshiden, qazaq kınosynyń maıtalmany - Sháken Aımanovtyń týǵanyna 110 jyl jáne «Qazaqfılm» kınostýdııasyna onyń esimi berilgenine 40 jyl toldy. Aldaǵy festıvalde osy aıtýly datalarǵa erekshe mán berilmek.
Búginde «Eýrazııa» kınofestıvali - Ortalyq Azııa óńirindegi eń mańyzdy mádenı sharalardyń birine aınaldy. 1998 jyly festıval qurylǵan sátten bastap «Eýrazııa» dástúrinde ósken qazaqstandyq kınematografısterdiń tutas býyny qalyptasty. Olardy «Eýrazııa urpaǵy» dep ataýǵa bolady.
Uıymdastyrýshylardyń aıtýynsha, bıyl kınofestıval aıasynda Halyqaralyq baıqaý ótedi, munda Eýropa men Azııa elderiniń tolyqmetrajdy fılmderi, sondaı-aq Ortalyq Azııa men Túrki álemi elderiniń fılmderi usynylady. «Eýrazııa» iskerlik alańy da kóptegen jańalyqtarǵa toly bolmaq. «Turan» ýnıversıteti men T.Júrgenov atyndaǵy Qazaq ulttyq óner akademııasynda túrli sheberlik sabaqtary men dóńgelek ústelder uıymdastyrylady. Kınematografıster PROKK (kınematografısterdiń kásibı klýby) aıasynda ózara tájirıbe almasady.
XVII «Eýrazııa» halyqaralyq kınofestıvaliniń saltanatty ashylý rásimi 24 qarashada qalanyń eń sándi oryndarynyń biri - Almaty Theatre-de ótedi.
Sondaı-aq, ár jyldary festıvaldiń qurmetti qonaqtary qatarynda Katrın Denev, Kevın Kostner, Izabel Adjanı, Per Rıshar, Sofı Marso, Djeremı Aırons, Ornella Mýtı, Stıven Sıgal, Sıgýrnı Ýıver, Jerar Deparde jáne basqa da kóptegen álemdik kıno juldyzdary bolǵanyn atap ótken jón.
