Foto: disk.yandex.ru
Qarjy mınıstrliginiń baspasóz qyzmetiniń aqparatynsha kezdesýge óńirdiń isker ortasy, memlekettik organdar men bıýdjettik uıymdardyń qyzmetkerleri, sondaı-aq ShOB pen «Atameken» UKP óńirlik fılıalynyń ókilderi qatysty.
Vedomstvo basshysy aıtqandaı, atalǵan zań satyp alý prosesiniń rásimderin jeńildetip, memleket esebinen satyp alynatyn taýarlardyń, jumystar men kórsetiletin qyzmetterdiń sapasyn arttyrýmen birge satypalym qatysýshylarynyń jaýapkershiligin kúsheıtip, básekelestikti damytýǵa baǵyttalǵan.
«Aıtalyq, zańnyń birinshi bólimi satyp alý prosedýralaryn jeńildetip, ony qysqartýdy kózdeıdi. Osy arqyly satyp alýdy jedel júrgizip, tapsyrys berýshilerge úlken ókilettikter berý, sondaı-aq satyp alý rásimderiniń uzaqqa sozylýynyń aldyn alý maqsatynda shaǵymdardy endi satypalymdy uıymdastyrýshynyń ózi tikeleı qaraıtyn bolady. Satyp alý qorytyndylaryna shaǵymdaný veb-portal arqyly jáne konkýrstyq komıssııamen aıqyndalǵan jeńimpazdyń satyp alýlar boıynsha ǵana júzege asyrylady», degen Mádı Tókeshuly reformadaǵy ózge de ózgerister týraly áriptesteri jan-jaqty túsindirip beretinin jetkizdi.
Qarjy vıse-mınıstri Dáýren Keńbeıildiń aıtýynsha, atalǵan qujattaǵy jańashyldyqtardyń biri básekelestikti damytýǵa arnalǵan. Máselen, memlekettik satyp alýdyń biryńǵaı operatory – Elektrondyq qarjy ortalyǵynyń bazasynda Biryńǵaı satyp alý platformasy zańnamalyq túrde engizilip otyr. Bul arqyly memlekettik ári kvazımemlekettik sektor sýbektileriniń satyp alýlarynyń elektrondy qyzmetteriniń qoljetimdiligi arta túsedi.
«Qazirdiń ózinde «Elektrondyq memlekettik satyp alý» aqparat júıesinde naqty ýaqyt rejiminde satyp alý rásimderin ótkizý týraly aqparat, jetkizýshiler men jasalǵan kelisimsharttar, sol sekildi olardy oryndaý nátıjeleri týraly málimetter jarııalanyp keledi. Byltyr osy júıede 602 myń áleýetti ónim berýshige arnalǵan 1,7 mln habarlandyrý ornalastyryldy. Barlyǵy 1,8 mln kelisimshart jasalyp, ótkizilgen memlekettik satyp alýdyń qarajat kólemi 6,6 trln teńge boldy», dedi Dáýren Maratuly.
Budan bólek tenderlerdi ótkizý merzimi 2 aıdan 10 jumys kúnine deıin qysqartyldy. Sonymen qatar memlekettik satyp alý nátıjelerine shaǵymdaný tártibi qaıta qaralyp, jeńildeı túsedi. Memlekettik mekemelerge memleket esebinen alynatyn taýarlardy, jumystar men kórsetiletin qyzmetterdi 100 aılyq eseptik kórsetkishten (AEK) 500 AEK — ke deıin, al aýyldyq okrýgter úshin konkýrstyq rásimderdi ótkizbesten bir ónim berýshiden 4000 AEK-ke deıin (memleket esebinen taýarlardy, jumystar men kórsetiletin qyzmetterdi) satyp alý múmkindigi engizildi.
«Bul óńirlerdegi jekelegen máselelerdi jedel sheshýge múmkindik beredi. Jergilikti óndirýshilerdi qoldaý maqsatynda jumys oryndalatyn mekende tirkelgen merdigerler úshin shartty dıskont 1 paıyzdan 2 paıyzǵa deıin ulǵaıtyldy. Bul shaǵyn jáne orta bıznesti damytýǵa jáne qoldaýǵa, sondaı-aq tıisti óńirlerde salyq túsimderin ulǵaıtýǵa oń áser etedi», dedi Qarjy mınıstriniń orynbasary.
Jıynnyń sońynda jergilikti turǵyndar kókeıkesti saýaldaryn joldap, vedomstvo ókilderi qoldanystaǵy zańǵa súıene otyryp, tushymdy jaýap berdi.
