Sýret: ru.freepik.com
- Shaıbaly hokkeıden elimizdiń áıelder quramasy Qytaıdyń bas shahary Beıjińde ótken Azııa chempıonatyn qola medalmen qorytyndylady. Sheshýshi oıynda burymdylarymyz Ońtústik Koreıamen sheberlik baıqasty. Negizgi ýaqyt 4:4 esebimen aıaqtaldy. Overtaımda da jeńimpaz anyqtalǵan joq. Al býllıt soǵýda jerlesterimizdiń joly boldy.
- Qurlyqtyq hokkeı lıgasynyń (QHL) eń úzdik bapkerleriniń reıtıngi jańartyldy. Astananyń «Barysyn» jattyqtyratyn Ǵalym Mámbetálıev 23 mamannyń arasynda ázirge 18-orynda. Kósh basynda – Igor Nıkıtın. Sóz oraıy kelgende Iаroslavldiń «Lokomotıv» klýbynyń tizginin ustaǵan 51 jastaǵy Nıkıtın О́skemenniń týmasy ekenin aıta ketken abzal. Sporttyq mansabyn jergilikti «Torpedoda» bastaǵan ol birer jyl elimizdiń ulttyq komandasy sapynda óner kórsetti.
- Kanadanyń Monreal qalasynda short-trekten World Tour týrnıriniń ekinshi kezeńi aıaqtaldy. О́kinishke qaraı, bul jarysta birde-bir jerlesimiz jeńis tuǵyryna kóterile almady. Eń úzdik nátıjege Denıs Nıkısha qol jetkizdi. Ol V tobyndaǵy 500 metrlik saıysta ekinshi oryndy enshiledi.
- Tórt jyl boıy UFC-de óner kórsetken aralas jekpe-jek sheberi Marııa Agapova 16 qarashada AQSh-tyń Atlantık-sıtı qalasynda kásipqoı bokstan óziniń ekinshi kezdesýin ótkizedi. Ol jergilikti bylǵary qolǵap sheberi Steısha Sattlspen saıysqa túsedi. Osyǵan deıin otandasymyz Germanııanyń ókili Nıkol Shefermen sheberlik baıqasyp, teń túsken edi.
- Fýtboldan Lıga kýboginiń fınaly 23 qarashada Túrkistanda ótedi. Atalǵan jarystyń bas júldesine elordalyq qos ujym – «Astana» men «Jeńis» talasady. Kýbok ıegeri 129 mıllıon teńge alsa, fınalda utylǵan komanda 89 mıllıondy enshileıdi.
- Reseıdiń VTB lıgasynda óner kórsetetin «Astana» basketbol klýby Ekaterınbýrgte jergilikti «Ýralmashtan» 62:72 esebimen utyldy. Sóıtip, elordalyq klýb qatarynan 12 ret jeńilistiń kermek dámin tatty.
- Saýd Arabııasynyń Er-Rııad qalasynda ótip jatqan WTA-nyń qorytyndy týrnırinde Elena Rybakına sátsiz óner kórsetip jatyr. «Kúlgin» tobyndaǵy otandasymyz tusaýkeser kezdesýinde Jasmın Paolınıge (Italııa) 6:7, 4:6 esebimen ese jiberse, kelesi básekede Chjan Sınvenge (Qytaı) jol berdi – 6:7, 6:3, 1:6. Endi ol sońǵy týrda Arına Sobolenkomen (Belarýs) saıysqa túsedi.
