Ramazan – birlik aıy

Qazaqstan musylmandary dinı basqarmasynyń tóraǵasy, Bas múftı

Erjan qajy MALǴAJYULYNYŃ qasıetti Ramazan aıyna baılanysty halyqqa

ÚNDEÝI

 Asa qamqor, erekshe meıirimdi Allanyń atymen bastaımyn! Qurmetti qaýym! Barshańyzdy asa ulyq qasıetti Ramazan aıynyń kelýimen quttyqtaımyn. Ramazan múbárak bolǵaı! Orazaǵa aman-esen jetkizgen Alla Taǵalaǵa sansyz shúkirler men madaqtar bolsyn! Qazaqstan musylmandary dinı basqarmasy bıyl da Ramazan aıyn úlken daıyndyqpen ótkizbek. Elimiz boıynsha meshitter men medreselerde, dinı oqý oryndarynda, qoǵamdyq ortalarda qaıyrymdylyq aksııalary, ıgi jobalar uıymdastyrylady. Barshańyzdy osy izgi is-sharalarǵa atsalysýǵa shaqyramyn. Ramazan – jalpyǵa ortaq izgi amaldar maýsymy. Oraza – tárbıe hám taqýalyq aıy. Alla Taǵala qasıetti Quranda: «Iá, múminder, ózderińnen burynǵylarǵa paryz etilgendeı, senderge de oraza ustaý paryz etildi. Bálkim, sender taqýa bolarsyńdar», degen («Baqara» súresi, 183-aıat). Orazada otbasy qundylyǵyn art­tyryp, jastarymyzdyń ımandy, Otanyn, halqyn súıetin, salt-dás­túrin ardaq tutar naǵyz azamat bolyp qalyptasýyna árdaıym kóńil bóleıik. Islam ǵulamalary: «Otandy súıý – ımannan», dep tálimdi tujyrym aıtqan. Ramazan – qaıyrymdy jandar úshin úlken múmkindik. Orazada jasalǵan Jaratýshy Iemizge unamdy árbir qaıyrly is – úlken saýap. Paıǵambarymyz Muhammed (Allanyń oǵan salaýaty men sálemi bolsyn) bir ósıetinde: «Adamdardyń jaqsysy – elge paıdasy tıgenderi», degen. Adam qalaı nıet etse, sol maqsatyna jetedi. Ár pende saýapty amalymen, taqýalyǵymen Allanyń aldynda dárejesi artady. Jomart, janashyr azamattardy, kásipkerlerdi kómekke muqtaj adamdarǵa qam­qor­lyq kórsetýge, máselen, sý tas­qynynan úısiz, sharasyz qalǵan otan­dastarymyzǵa qaıyrymdylyq ja­saýǵa, tabıǵı apat saldarynan bu­zylǵan kópir men joldy jóndeýge úles qosýǵa, jetim men jesirge meıirimdilik tanytyp, qaraýsyz qalǵan qarttarǵa kóńil bólýge shaqyramyn. Elbasy Ulytaý tórinde ult týraly, din, til jaıly bergen ulaǵatty suhbatynda asyl dinimizdiń turmysy tómen jandarǵa kómektesý, baýyrmal bolý, úlkendi syılap, kishige izet kórsetý syndy asyl qundylyqtaryn sóz etkeni esimizde. Osyndaı ortaq ıgi amaldar jurtymyzdy jaqsylyqqa, izgilik pen birlikke uıystyrady. Qasıetti aıdyń qurmeti úshin halyqtyń turmystyq qajettilikterine jeńildik jasalyp, Qudaıy astar men toılar aýyzashar ýaqytynda uıymdastyrylsa degen tilegimdi bil­diremin. Ramazan – birlik aıy. Osy aıda beriletin aýyzasharlar aǵaıyn-jurttyń arasyn jaqyndastyryp, ıgi is-sharalar men qaıyrymdylyq aksııa­lar halqymyzdy senimi men násiline qaramaı, ortaq maqsatqa úndeıdi. Búkil álemniń Jaratýshysy barsha adamǵa: «Bólinbeńder», dep baýyrmal bolýǵa buıyrǵan. Birligi kúshti eldiń berekesi artady. Qymbatty otandastar! Ramazan aıynda jasaǵan amaldarymyz ben izgi nıetterimizdi Alla Taǵala qabyl etip, saýapty isterimiz árdaıym jalǵasa bergeı! Táýelsizdigimizdiń tuǵyry bıik, memleketimizdiń mereıi ústem, elimizdiń bolashaǵy baıandy bolǵaı! Áýmın!