S.Aıtbaev atyndaǵy Kórkemsýret galereıasynda ótken is-sharada Qyzylorda oblystyq tarıhı-ólketaný mýzeıi dırektory Sapar Kózeıbaev el arasyndaǵy murany jınaqtaǵan mekemeniń 85 jyldyǵyna oraı bıyl Syrǵa ár óńirden osyndaı kóne jádiger jınaqtaǵan kóshpeli kórmeler kelip jatqanyn atap ótti. Osyndaı mádenı baılanys aıasynda aımaqqa jetken ǵasyrdan astam tarıhy bar Túrkistan oblystyq tarıhı-ólketaný mýzeıi qoryndaǵy qundy muralar kópti qyzyqtyrady.
Kórme qonaqtary Uly Jibek joly boıyndaǵy Túrkistan, Shoıtóbe, Qaraspantóbe, Otyrar, Altyntóbe, Mardankúıik qalalarynyń fotosýretterin tamashalady. «Er qarýy – bes qarý» bóliginde qynynan jańa sýyrylǵandaı jarqyraǵan qylyshqa kózimiz tústi. Jaqyndap kelip qazaqtyń sońǵy hany Kenesarynyń qylyshy ekenin oqyǵanymyzda, tipti aıran-asyr boldyq. El erkindigi úshin atqa qonǵan árýaqty erdiń janynan tastamaǵan qarýyn nemeresi Ázimhan Kenesarın sonaý 1931 jyly tapsyrypty. Sol zamannyń yzǵarynan seskengender qabyldaý qaǵazynyń bir buryshyna Ázimhan Kenesarın esimin eleýsizdeý etip jazyp ketken eken. Atadan qalǵan murany mýzeıge amanattaǵan qaıratker 1937 jyly «halyq jaýy» degen jalamen sottalyp, atylyp ketken. Mýzeıdegiler han qolynyń taby qalǵan qylyshty uzaq jyl boıy kópshilik kózinen tasa ustap kelipti.
«Bul – bizdiń mýzeıdegi eń qundy jádigerdiń biri. Astanada ótken V Dúnıejúzilik kóshpeliler oıyndaryndaǵy kórmeden keıin qyzyǵýshylar qatary tipti arta tústi. Áli kúnge deıin tot baspaýy qarýdyń asyl temirden soǵylǵanyn kórsetedi. Osydan da qarýdyń qandaı metaldan jasalǵanyn zerttegisi keletin mamandar tabylyp otyr. Alda osy baǵytta jumys isteýimiz múmkin», deıdi Túrkistan oblystyq tarıhı-ólketaný mýzeıiniń dırektory Baıan Aıtymbet.
Kórmege Túrkistan oblysynyń arheologııalyq jáne etnografııalyq murasy, zergerlik buıymdar kolleksııasy da qoıylǵan. Qazaqtaǵy gobelen óneriniń bastaýynda turǵan Batyrbek О́teptiń mýzeı qoryndaǵy Uly dala órkenıetimen tanystyratyn týyndylary da jıylǵan jurttyń nazaryn aýdardy.
Qyzylorda
