Bul – el shebinde jol talǵamaıtyn «JAK T-6» jáne optıkalyq-elektrondyq baqylaý júıesi ornatylǵan «Sobol» avtokólikteri. Temir arǵymaqtardyń kiltterin júrgizýshilerge shekara basqarmalarynyń basshylary men shekarashy ardagerler tabystady.
Este bolsa, byltyr alǵash ret satyp alynǵan 60-tan asa «JAK T-6» júrdek kóligi shekaraǵa eksperıment retinde jiberilgen edi. Shekarashylardyń el shebindegi jaýapty qyzmetinde atalǵan kólik synaqtan sátti ótip, UQK Shekara qyzmetiniń basshylyǵy shekarada dástúrli «ÝAZ» avtokóligin tolyq almastyra alatyn zamanaýı úlgidegi tehnıkamen jabdyqtaýǵa sheshim qabyldaǵan.
Shekarashylarǵa kólik kiltin tabystaý saltanatynda sóz sóılegen UQK Shekara qyzmeti dırektorynyń orynbasary Dáýlet Dúısenbekov: «Shekara qyzmetin kezeń-kezeńimen qaıta jabdyqtaý aıasynda áskerı tehnıkanyń jańa úlgileri qaralady, nátıjesinde, memlekettik shekarany tikeleı kúzetetin bólimsheler osymen ekinshi márte eki maqsatta qoldanýǵa bolatyn osyndaı avtokólikterdi alyp otyr. Búgin 75 avtokólik tabystaldy, bul – óz kezeginde memlekettik shekarada quqyqqa qarsy is-qımyldy toqtatýǵa eleýli úles qosady», dep atap ótti.
Sondaı-aq Shekara qyzmetiniń otstavkadaǵy general-maıory Marat Májıtov jol talǵamaıtyn avtokólikter shekarashylar úshin qanshalyqty mańyzǵa ıe ekenin aıtyp, shekara soqpaǵyndaǵy óz estelikterimen bólisti.
Is-shara aıasynda el aýmaǵy boıynsha ótken «Jyldyń eń úzdik júrgizýshisi» saıysynyń jeńimpazdary marapattaldy. Básekede qarsylastarynan oq boıy ozyp, jeńimpaz atanǵan – Mańǵystaý oblysynyń Qaraqııa aýdany boıynsha shekara basqarmasynyń kelisimshart qyzmetiniń qatardaǵy jaýyngeri Q.Ergesh. Qolyna sý jańa qyzmettik kóliktiń kiltin alǵan jaýynger óz áserimen bólisti.
«Búgin men úshin jańa qyzmettik avtokóliktiń kiltin alý – zor mártebe. Bul sát men úshin ǵana emes, memlekettik shekaranyń boıynda qyzmet atqaryp júrgen barlyq áriptesim úshin de asa mańyzdy. Biz «JAK T-6» jáne «Sobol» sııaqty jańa avtokólikter shekaralarymyzdyń qamtamasyz etý boıynsha tapsyrmalardy tıimdirek oryndaýǵa kómektesetinin túsinemiz. Men ózime senip tapsyrylǵan temir tulparymdy kútip ustaýǵa ýáde beremin ári shekara bólimshelerin zamanaýı tehnıkamen jabdyqtaýǵa aıryqsha kóńil bólingenine qýanamyn», deıdi Q. Ergesh.
Saltanatty rásimge kelgen qonaqtar sý jańa kólikterdiń múmkindikterimen tanysqan soń, temir arǵymaqtar óz departamentterine qaraı jolǵa shyqty.
ALMATY
