Týrnırge elimizdiń, Birikken Arab Ámirlikteriniń sportshylary tizgindegen, Qostanaı, Adaı tuqymdarynan iriktelgen 16 jylqy qatysty. Shabandozdar bir kúnde 100 shaqyrym qashyqtyqty júrip ótip, tózimdilikti, sheberlikti, aqyl-oı kúshin kórsetti.
Halyqaralyq At sporty federasııasy jylqynyń tózimdiligi jónindegi tehnıkalyq komıtetiniń basshysy Muhammed Álı Amer Omar Ál-Hadramıdiń aıtýynsha, jarystyń bul túri qazaqtyń dástúrli at jarysyna óte uqsas. Qazaq jylqylarynyń daıyndyǵy óte jaqsy, munda ǵasyrlar boıy jylqy sharýashylyǵy damyǵan. «Qazaqstannyń at sportynan halyqaralyq jarystardy ótkizý áleýeti joǵary, óıtkeni geografııalyq turǵyda Reseı, Qytaı, О́zbekstan, Qyrǵyzstan, taǵy basqa elder arasynda óte tıimdi ornalasqan. Bolashaqta osy óńir at sportynyń damý ortalyǵyna aınalýy múmkin», dedi Ál-Hadramı.
Is-sharanyń basty maqsaty – elimizde at sportyn nasıhattaý, damytý, qazaqy jylqy tuqymdarynyń, ıaǵnı Qostanaı, Adaı jylqylarynyń áleýetin arttyrý. Sondaı-aq elimizdiń tóreshiler alqasynyń tóreshilik sapasyn, kásibı daǵdylaryn jetildirý, talantty shabandozdar men jylqylardy anyqtaý, olardy halyqaralyq týrnırlerge qatystyrý jumystaryn jandandyrý.
«Búginde Adaı, Qostanaı tuqymdarynyń jylqylary joıylyp ketý aldynda. Sonymen qatar elimiz at sportynan halyqaralyq týrnırlerge usynyla bermeıdi. Osy turǵyda uıymdastyrýshylardyń negizgi kózdegeni bolashaqta otandyq jylqylarǵa álemdik dodalarǵa jol ashý úshin Halyqaralyq At sporty federasııasy men tóreshiler komıssııalarynyń tóreshilerine jergilikti jylqy tuqymdaryn tanystyrý boldy. Búgingi 100 shaqyrymdyq jarysta attar 20, 30 shaqyrym saıyn demalyp, olardyń júrek qaǵysyn, jalpy jaǵdaıyn veterınar mamandar tolyq tekseristen ótkizip otyrdy. Týrnırdiń basty sharty – jarysqa qatysatyn jylqynyń jasy alty jyldan joǵary bolýy kerek. Sondaı-aq shabandozdyń salmaǵy 70 kg-nan tómen bolmaýy mańyzdy. Jarysqa qatysýshylar arasynda Majarstan men BAÁ-den kelgen shabandoz qyzdar bar. At jarysy Halyqaralyq At sporty federasııasynyń erejelerine saı ótkizildi. Ereje boıynsha 30 shaqyrym shaýyp kelgen jylqynyń júrek qaǵysy 60-tan kóp bolmaýy kerek. 15 mınýttyq úziliste júrek qaǵysy osydan artyq bolsa, ol jylqy jarys-tan shyǵarylady. О́ıtkeni attyń densaýlyǵyna zaqym keledi. Attar saǵatyna ortasha eseppen 16–17 shaqyrymdy júrip ótedi. Sondyqtan bul sport túrinde alaman báıgedegideı attar qulap nemese jaraqat alyp qalmaıdy. Soǵan qarap, jylqyǵa meıirimdi sport túri deýge bolady», deıdi ıppolog Ahat Razaq.
«Biz álemge Adaı, Qostanaı jylqy tuqymyn tanytyp, olardyń álemdik týrnırlerge qatysýyna múmkindik jasaǵymyz keledi. Aldaǵy 2025 jyly da elimizde jarystyń osy túrin ótkizýdi josparlap otyrmyz. Otandyq sportshylardy 2026 jyly Qostanaı, Adaı tuqymdarynyń jylqylarymen Saýd Arabııasyn-da ótetin álem chempıonatyna qatystyrý – basty maqsatymyz», deıdi jarysty uıymdastyrýshy ári bas demeýshi, «Qobylandy» jylqy zaýytynyń dırektory Shyńǵys Dosmuhambetov.
Jarysty uıymdastyrýshylar – At sporty federasııasy, «Baıserke Agro» agroholdıngi, «Qobylandy» jylqy zaýyty. Is-shara BAÁ vıse-prezıdenti sheıh Mansýr Al Nahaıan men onyń «Emirates International Endura» komandasynyń qoldaýymen ótti. Shetelden kelgen mamandar jarysqa tóreshilik etip, elimizdiń veterınarlary men tóreshilerin úıretti.
«Baıserke Agro» JShS «At sporty federasııasy» RQB-men birlesip, jylqynyń densaýlyǵyna, qaýipsizdigine tolyq qamqorlyq jasaıtyn jylqynyń ál-aýqat kodeksin bekitti.
Sonymen 100 shaqyrymdyq jarysta týrnır jeńimpazdary anyqtalyp, baǵaly syılyqtarmen marapattaldy. Bas júldeni Mańǵystaý oblysynan qatysqan Kókjebe atty tulpar, shabandozy Omar Nursultan ıelenip, Ravon avtokóligin taqymdady. 2-oryndy Jetisý oblysynyń júırigi Baqtory, shabandoz Dárgerbek Habaı ıelense, 3-orynǵa mańǵystaýlyq Tobylǵy tory, shabandoz Nursultan Qumarov jaıǵasty. Abaı oblysynyń tulpary Gúlsary, shabandoz Vıktor Janalıev 4-orynǵa turaqtasa, 5-oryn Jetisý oblysynyń Qaharman aty, shabandoz Dáýlet Beıisbaevqa buıyrdy.
Majarstannan kelgen Nobel aty, shabandoz Mehok Orhıdeıa altynshy, Almaty oblysynyń júırigi Neapol, shabandoz Natalıa Dolgıh jetinshi bolyp máre syzyǵyn qıdy. Barlyq júldeger bas demeýshi «Baıserke Agro» holdınginiń aqshalaı syılyǵyna ıe boldy. Jalpy júlde qory 4 mln teńgeni qurady.
Mamandardyń aıtýynsha, bul sport túrin jetildirýge kóptegen izdenis kerek. Búgingi jarysqa qatysqan attarǵa halyqaralyq kýálik berilip, ekpe salynǵan. Sol turǵyda jarys jolyna shyqqan attar únemi babynda bolýy úshin at sporty bazasy uıymdastyrylýy kerektigi de ózekti másele.
Almaty oblysy
