Sýret: adyrna.kz
Bas prokýrordyń baspasóz qyzmeti taratqan málimdemesinde Aýstralııanyń quldyqqa qarsy komıssary osy jyldyń 2 jeltoqsanynda qyzmetine kirisedi. Onyń ókilettik merzimi – 5 jyl.
«Komıssar qyzmeti qazirgi quldyq qanaýdyń barlyq túrin qamtıdy. Onyń ishinde adam saýdasy, májbúrli neke, eriksiz eńbekke májbúrleý, zańsyz adam jaldaý bar. Quldyqqa qarsy komıssar Aýstralııa úkimetiniń mundaı quqyq buzýshylyqtardyń aldyn alý, quldyq qurbandaryna qoldaý kórsetý jónindegi jumysyn basqarady ári úılestiredi», dep málimdedi M.Dreıfýs.
El bıligi jańa komıssar men onyń keńsesin qamtamasyz etýge 8 mln Aýstralııa dollaryn (5,3 mln dollar) bólgenin aıtty.
«Walk Free» uıymynyń jahandyq quldyq ındeksine súıensek, qazir Aýstralııada 41 myń adam quldyq qursaýynda júr. Máselen, qyrkúıek aıynda Jańa Ońtústik Ýelstiń quldyqqa qarsy komıssary, doktor Djeıms Kokeın jarııalaǵan esebinde Aýstralııanyń eń kóp qonystanǵan shtatynda 16 400 adam quldyqta ómir súrip jatqanyn aıtady. Buǵan Jańa Ońtústik Ýelstiń parlamenti jaýap berip, osy máselege qatysty tekseris bastaǵan.
«Ýaqytsha eńbek mıgranttaryna, ásirese, Jańa Ońtústik Ýelstiń aýyldyq jerlerindegi aýyl sharýashylyǵy, baý-baqsha jáne et óńdeý salalaryndaǵy jalaqysy tómen jumysshylarǵa jalaqysy ýaqytynda tólenbeıdi. Olar qaryz quldyǵy, aldap adam jaldaý, májbúrli eńbekke tartylyp, seksýaldyq quldyq, adam saýdasy qaýpine ushyraǵan», dep kórsetti D.Kokeın.
Osynyń saldarynan myńdaǵan jumysshy jumys oryndaryn tastap, qasha bastaǵan. Alaıda olardyń vızasy men Aýstralııada bolý quqyǵy naqty jumys berýshige baılanysty bolǵandyqtan, olardyń quqyqtaryn qorǵaý qıynǵa soǵyp tur. Qujatsyz júrgen mıgranttardyń sany artqan, olar turǵylyqty jer taba almaı, medısınalyq saqtandyrýdan qaǵylyp, zańdy jumysqa da ornalasa almaı júr.
«The Guardian» málimetine sáskes, júzdegen jumysshy qazir Jańa Ońtústik Ýelstiń Riverina qalasyndaǵy lagerlerge qonystanǵan, olarǵa qoldaý kórsetetin qaýymdastyq toptary kómektesýge tyrysyp jatyr. Alaıda turýǵa qajetti shatyrlar jetispeı, azyq-túlikpen qamtamasyz etý de qıyndyq týǵyzǵan.
Jalpy, eńbek mıgranttarynyń quqyǵyn qorǵaýda memleketaralyq kelisimder mańyzdy ról atqarady. Al eger adam zańsyz jolmen ózge elge baryp aqsha taýyp, quldyqqa tap bolsa, odan shyǵý ońaıǵa soqpaıdy. Mysaly, Taıland, Mıanma, Laos elderiniń arasyndaǵy «altyn úshburysh» dep atalatyn qaýipti aımaqtarda 100-ge jýyq otandasymyz joǵalyp ketkeni BAQ-da jarııalanǵan edi. Statıstıkalyq málimetterge súıensek, keıingi eki jylda qylmystyq toptardan 28 el azamaty qutqarylǵan. Sondyqtan shetelge jumysqa baram deýshilerge Qazaqstan birneshe elmen úkimetaralyq kelisimderge qol qoıǵanyn eske salamyz. Osy jyldyń mamyrynda Eńbek jáne halyqty áleýmettik qorǵaý mınıstrligi kóshi-qon saıasatynyń 2023–2027 jyldarǵa arnalǵan tujyrymdamasyn iske asyrý aıasynda birqatar elmen ekijaqty kelissózder júrgizip, Túrkııa, BAÁ, Saýd Arabııasy, Ulybrıtanııa, Koreıa, Izraıl, Germanııa, Latvııa jáne Jańa Zelandııamen úkimetaralyq kelisimderge qol qoıdy. Munda eńbek mıgranttarynyń kelýi, elde bolýy men ketý tártibi, eńbek jaǵdaılary, jalaqy, ótemaqylar tóleý tártibi rettelip, kórsetilgen.
