Kúni keshe Sherıazdan Eleýkenovtiń týǵanyna 95 jyl tolýyna oraı Ál-Farabı atyndaǵy QazUÝ kitaphanasynda «Ulttyq kitaptana máseleleri: tarıhy jáne búgingi jaǵdaıy» atty halyqaralyq ǵylymı-tájirıbelik konferensııa ótip, onda qaıratkerdiń kisilik qyry men ǵylymdaǵy ustanymy baıandamalarǵa arqaý boldy.
Jıyndy Jýrnalıstıka fakýltetiniń dekany, fılologııa ǵylymynyń kandıdaty Qanat Áýesbaı júrgizdi. Ýnıversıtettiń basqarma múshesi – akademııalyq máseleler jónindegi prorektory Abaı Qazmaǵambetov sóz sóılep, ǵalymnyń ǵylymǵa qosqan úlesin zor baǵalady. «Adaldyq, adamgershilik, eńbekqorlyq qaǵıdalaryn basty orynǵa qoıǵan Sherııazdan Eleýkenov qandaı qyzmet atqarsa da ulttyq ustanymynan tanǵan emes» degen ol ǵalym osy tabandy eńbegi men izdenisteriniń nátıjesinde fılologııa ǵylymdarynyń doktory, professor, Qazaqstannyń eńbek sińirgen mádenıet qaıratkeri, Memlekettik syılyq laýreaty atanǵanyn aıryqsha atap ótti.
«Qazaq ádebıeti» gazetiniń bas redaktory Baýyrjan Jaqyp Sh.Eleýkenovtiń ustazdyq joly men ǵylymdaǵy ónegesin baıandamasyna arqaý etti. Sondaı-aq professorlar Janǵara Dádebaev, Namazáli Omashuly, Qanseıit Ábdezuly, Qońyr Muqataıqyzy, Temirǵalı Kópbaev, Saǵatbek Medeýbekuly kitaptaný máselelerimen qosa qaıratkerdiń ádebıettaný, baspa isi salasyndaǵy eńbegine taldaý jasady. Professor Temirǵalı Kópbaev ǵalymnyń kóptomdyǵyn shyǵarý isi toqtap qalǵanyn aıtyp, osy jaǵdaıdyń sheshilýi kerek ekenin jetkizdi. Al Nurdaýlet Aqysh, Serikqazy Qorabaı, Gúljahan Orda, Elena Dýdınova sekildi bir top ǵalym Sherııazdan Rústemulynyń qalamynan shyqqan týyndylar jóninde áńgimeledi.
О́z kezeginde ǵalymnyń uly, fızıka-matematıka ǵylymynyń doktory Dastan Eleýkenov halyqaralyq konferensııany uıymdastyrýshylarǵa alǵys aıtyp, áke amanaty men ustanymy qandaı bolǵanyn aıtyp berdi.
Sherııazdan Eleýkenulynyń eńbekteri túrki eline de qundy. Qyrǵyz Respýblıkasy J.Balasagyn atyndaǵy QUÝ-niń Jýrnalıstıka jáne kommýnıkasııa ınstıtýtynyń dırektory, áleýmettik ǵylym kandıdaty, dosent Shırın Kostıýk jáne Túrkııanyń Sakarııa ýnıversıtetiniń professory Mýhammed Bılal Chelık osylaı dedi. Sheteldik ǵalymdar da túrki eline ortaq tulǵa Sh.Eleýkenovtyń qaıratkerlik qyry men baspa isindegi eńbegine toqtaldy.
Halyqaralyq konferensııa materıaldary arnaıy jınaq bolyp jaryq kórip, is-shara barysynda kópshilikke tanystyryldy. Buǵan qosa is-shara aıasynda ál-Farabı kitaphanasynyń foıesinde ǵalym shyǵarmashylyǵy men ómirine arnalǵan kitap kórmesi jáne fotokórme uıymdastyryldy.
Qaragóz SERIKQYZY,
baspagerlik-redaktorlyq jáne dızaınerlik óner kafedrasynyń oqytýshysy
