Taıaýda qurylysy byltyr bastalǵan Qordaı aýdanyndaǵy «Korcem» sement zaýytynyń óndiristik jelisi paıdalanýǵa berildi. Orta Azııadaǵy zamanaýı ári qaldyqsyz ónim shyǵaratyn irgeli zaýyt táýligine 3 500 tonna sementke qajetti klınker shıkizatyn óndirýge qaýqarly. Mamandardyń aıtýynsha, sıngapýrlyq «Internetional Cement Group LTD» kompanııasymen ózara yntymaqtastyq nátıjesinde boı kótergen zaýyttyń keleshegi jarqyn.
«Qazaqstan, onyń ishinde Jambyl óńiri sheteldik ınvestorlarǵa qoldan kelgenshe qoldaý kórsetip otyr. Búginge deıin óńirde qolǵa alǵan jobalarymyz jemisti bolǵanyn aıta ketken jón. Birlese atqarǵan tıimdi jumys arqyly kóńil kónshiterlik nátıjege qol jetkizdik. Qońyrjaı beldeýde ornalasqan Qordaı aýdanynyń tabıǵı resýrsqa baı ekenin bárimiz jaqsy bilemiz. Shekaralyq aımaqta ornalasqan aýdan Ortalyq Azııadaǵy eksporttyq áleýetimizdiń eselene túsýine múmkindik beredi. Muny kompanııa ókilderiniń aldyn ala jasaǵan boljamy da aıqyndap otyr. Sondyqtan «Internetional Cement Group LTD» ujymy aldaǵy ýaqytta óńirdegi jemisti jumysty jalǵastyryp, jańa jumys oryndaryn qurýǵa nıetti. Sondaı-aq Qazaqstanǵa ózge de sheteldik ınvestorlardy tartýǵa kúsh salamyz», deıdi kompanııanyń atqarýshy dırektory Bendjamın Chen.
Zaýyt basshylyǵy alǵashqy kezeńde 500 adamdy turaqty jumyspen qamtýǵa bel býyp otyr. Kásiporyn tolyq qýatpen jumys istegen kezde turaqty jumyspen qamtylǵan azamattar sany 1 000-ǵa jetpek. Resmı derekke sensek, zaýyttyń jalpy quny 50 mlrd teńgeni quraıdy. Jaýapty azamattardyń aıtýynsha, zaýyt aldaǵy jyldary elimizdegi sement óndirisiniń 35 paıyzyn qamtıtyn kórinedi.
«Mundaǵy iske qosylǵan qazandyq bóligi óndiris oshaǵynyń negizgi tetigi ekeni málim. Ol sement óndirisine qajet sanalatyn klınker shıkizatyn óndiredi. Qazirgi kezde elde qurylys jumystarynyń aýqymy arta túskeni belgili. Budan bólek, taıaýda ǵana AES salý boıynsha naqty sheshim qabyldanǵan bolatyn. Munyń bári ónimge degen suranysty arttyratyny anyq. Bizge jetken derekke sensek, óńir jerasty qazba baılyqtary jóninen eldegi úzdik úshtikke kiredi eken. Osyǵan qarap-aq bizdiń kásiporynnyń múmkindigi mol ekenin baǵamdaýǵa bolady. Bolashaqta shıkizattan bólek, beton buıymdaryn shyǵarýǵa da nıettenip otyrmyz», deıdi «Korcem» JShS atqarýshy dırektory Stanıslav Sherbakov.
Zaýyt qurylysyn júzege asyrýǵa yqpal etken sıngapýrlyq kompanııa ókilderi jergilikti atqarýshy bılik tarapynan aıtarlyqtaı koldaý kórsetilgenin aıtyp otyr. Sondaı-aq olardy óńirdiń geologııalyq ahýaly da beıjaı qaldyrmaǵan. Derekke júginsek, «Internetional Cement Group LTD» kompanııasy 1993 jyldan beri sement naryǵynda jemisti jumys istep júr. Qazir bizdiń elden bólek, Ortalyq Azııadaǵy Tájikstanda enshiles kompanııalary bar.
«El Prezıdentiniń tapsyrmasy aıasynda óńirimizde birneshe iri ınvestısııalyq joba júzege asyrylyp jatyr. Klınker shıkizatyn óndiretin óndiris jelisiniń mejeli merzimde iske qosylýy – atqarylǵan jumystyń naqty nátıjesi. Bolashaqta taǵy bir sıngapýrlyq kompanııamen osy sekildi zaýyt qurylysyn júrgizý boıynsha jumysty qolǵa aldyq. Bul zaýyt jylyna 1,5 mln tonna shıkizat óndiredi. О́nim ishki naryqty qamtyp qana qoımaı, eksporttyq áleýetimizdi kóterýge de múmkindik beredi. Qalaı alyp qarasaq ta, óńirimiz ýaqyt ótken saıyn qarqyndy damyp keledi. Sondyqtan ınfraqurylymdyq keshen úshin qurylys materıaldaryna degen suranys ýaqyt ótken saıyn arta túspek. Osy turǵydan alǵanda kásiporynnyń tıgizer paıdasy zor», deıdi óńir basshysy Erbol Qarashókeev.
Jalpy alǵanda, óńirge sheteldik ınvestorlardy tartý jumysy aldaǵy ýaqytta keshendi túrde jalǵasady. Qazir oblystyń ınvestısııalyq qorjynynda jalpy quny 3,4 trln teńgeni quraıtyn 80-ge jeteǵabyl joba bar. Bul jobalar iske asqan jaǵdaıda 4 myńnan astam adam turaqty jumys ornymen qamtylmaq.
Jambyl oblysy
