Foto: Oqý-aǵartý mınıstrligi
Úkimet basshysynyń tapsyrmasyna sáıkes Oqý-aǵartý mınıstrligi Densaýlyq saqtaý mınıstrligimen birlesip elimizdegi mektep ashanalarynyń sanıtarııalyq-epıdemıologııalyq talaptarǵa sáıkestigine monıtorıng júrgizdi. Respýblıkalyq monıtorıngtiń qorytyndylary týraly Ǵanı Beısembaev baıandady.
Oqý-aǵartý mınıstri respýblıkalyq monıtorıng qorytyndysynda mekteptegi tamaqtandyrýdyń uıymdastyrylý sapasyna qatysty suraqtardyń týyndaýy atqarýshy organdar tarapynan áli de bolsa baqylaýdyń jetkiliksizdigin kórsetkenin, sondaı-aq muny zańnama talaptarynyń buzylý faktilerinen de anyq ańǵarýǵa bolatynyn atap ótti. Monıtorıng toby zań talaptaryn buzylýy boıynsha 771 faktini anyqtaǵan.
Sondaı-aq Mınıstrlik mektepte tamaqtandyrýdy uıymdastyrý boıynsha keshendi baǵalaý júrgizdi. Baǵalaý kezinde tamaqtandyrý sapasyna júrgizilgen monıtorıng nátıjeleri, ashanalardyń qajetti materıaldyq-tehnıkalyq jabdyqtalýy, 1 oqýshyǵa shaqqandaǵy óńirlerdegi tamaqtaný quny, ata-analar arasynda júrgizilgen saýalnama nátıjeleri eskerildi. Onyń nátıjesinde Jambyl, Mańǵystaý, Almaty, Atyraý oblystarynyń jáne Shymkent qalasy ákimdikteriniń tarapynan mektepterde sapaly tamaqtanýdy uıymdastyrýǵa tıisti deńgeıde kóńil bólinbeı otyrǵandyǵy anyqtaldy.
«Qazirgi tańda Mınıstrlik mektepte tamaqtandyrý qyzmetterin satyp alý kezinde ónim berýshilerdi irikteý talaptaryn buzǵany úshin laýazymdy tulǵalarǵa ákimshilik jaýapkershilik engizý máselesin pysyqtaýda», dep qorytyndylady Ǵanı Beısembaev.
Esterińizge sala keteıik, buǵan deıin mınıstrlik talaptardy kúsheıtip, bilim berý uıymdarynda tamaqtandyrýdy uıymdastyrýǵa qatysty 7 normatıvti-quqyqtyq aktini qaıta qaraǵan bolatyn.
